2023 hmain Sub-Centre upgrade hman vek tum

Health Minister, Dr. R. Lalthangliana chuan kum 2023 ralhma in thingtlang lama Sub-Centre zawng zawngte upgrade hman vek an tum thu a sawi.

Health Minister Dr. R. Lalthangliana hian nimin khan Ailawng Sub-Centre leh PHC Reiek te tlawhin cheng nuai 200 senga PHC Reiek Building sak mek pawh a en nghal a, he hunah hian Health Minister chuan thingtlang lama Sub-Centre zawng zawngte kum 2023 ralhmaa Upgrade hman vek an tum thu sawiin, Staff Nurse, Health Worker leh IVth Grade mamawh an thlen te pawh Covid-in min tihbuai zel loh chuan a theih ang anga hnawhkhah zel an tum thu a sawi a. MNF sawrkarah chuan Health Sub-Centre leh PHC-te chuan sawrkar hmasa ai chuan damdawi lam an dawng tha hlawm hle niin a sawi bawk.

Health Minister hian W. Lungdar Sub-Centre, Hreichuk Sub-Centre, Lungphun Sub-Centre leh Kanghmun PHC-te pawh tlawhin, “Aspirational District in nih angin India ramah a titha ber pahnihna in ni tawh a, pakhatna ni thei turin tan lo la ang che u,” tiin Aspirational District an nih angin thil tam tak an dawn tawh thu a sawi a. Mamit District Hospital cheng vbc. 17 man sak mek a nih thu te, Sub-Centre leh Staffs Quarters engemaw zat sak mek a nih thu te, Bolero Pick-Up 11 a vailiam tawh thu leh Ambulance 7 leh Two Wheeler Ambulance thlengin pek an nih tawh thu a sawi bawk.

Health Minister hian Chungtlang, Rulpuihlim, Tuahzawl leh Rawpuichhip PHC leh Sub-Centre dinhmunte enfiahin a tlawh leh nghal bawk a, heng hmun a tlawhna ah hian Health Minister hi Govt. Deputy Chief Whip, Lalrintluanga Sailo MLA leh Health Department-a Officer pawimawh ten an tawiawm bawk a ni.

Comments

Popular posts from this blog

Bialtu MLA in Laptop pe