Ngaihtuah ngai kan thlai thar

Ngaihtuah ngai kan thlai thar

Mizoram sawrkar hmalakna hnuaiah Serchhip District in Tomato kan chin te chuan a vanglai a thleng chho mek a, kumin hian a thar tir lamah tualchhung tharchhuah Tomato te hi kg. 1 zelah Rs. 100/- ve te a nih laiin tunah chuan kg. ah Rs. 30/- vel te pawhin lei tur a awm leh tawh niin a lang a. Hetiang bawk hian kan tharchhuah tam Zikhlum te pawh a tir lamah man sang tak ni thin mah se a thar a tam lai chuan dahthatna tur tha kan neih tawkloh vang te pawh a niang, man tlawm tak takin zawrh a ngai thin a, hei vang hian thlai tharchhuah dahthatna hmun lian leh tha, kuthnathawktu ten tangkai taka an chhawr theih tur hi kan ngaihtuah belh zel a tul hle a ni.

Kum kalta ah khan Mizoram sawrkar chuan Serchhip Sailiamkawn-a Horticulture Department hmun-ah thlai dahthatna tur hmun hi siamin hei hi tangkai taka hman theih a ni a, amaherawh chu helai hmun hmang tur tan hian hman man tlem azawng lak ve te ngai tura ruahman a nih avangin tlem chuan a hautak ve hlek dawn niin a lang a. Hetihlai hian tunhnai khan Leng khua chuan Kawl-phetha hman ngai lova Serthlum vawnthatna tur an siam chu an khua tlawhtu RD Minister chu an lo enpui a, hemi hmang hian a rah hun lo-ah pawh Serthlum hi an nei thei dawn tih an sawi nghe nghe a ni.

Hetianga Leng khua in ruahmanna an siam ang leh hma an lakna ang hian heng kan thlai thar vawnthat leh dahthatna tur ah pawh hian thlai chingtute hian rilru kan sen zui hi a pawimawh hle mai a. Chutiang bawkin sawrkar in thlai thar hralhna lama hma a lak tawhna entawn chung khan kan thlai hralh-chhuahna lamah te pawh hian kalphung tha zawk kan ngaihtuah chhuah a hun tawh viau a ni.