VC leh YMA in In sak sak

Chhiahtlang South Village Council leh Chhiah-tlang Kawn Veng VC te chuan nimin atang khan an huamchhunga chhungkaw pakhat chenna In tur an sak sak.

Thudawn danin Chhiahtlang South VC leh Chhiahtlang Kawn Veng Branch YMA ten chenna In tur an sak sak hi Roliana te niin an nupa-a khawsa an ni a, an In luahlai chu a chhiat deuh tawh avang leh Fur tuar lehna tur atan chuan a ngaihtuahawm deuh tawh nia a lan bakah anmahni tan chuan In hi sak a harsat si avangin VC leh YMA te hian an In hi sak sak an rel a, In hi a dung ft. 18 leh a vang ft. 15-a zau in Assam Type-a sak tur a ni ang.

He In sakna atan hian Chhiahtlang South VC te hian State Finance Commission Grant (SFC) atanga hnathawhna tur sum an hmuh an hman bang te an hmang dawn a, Chhiahtlang Kawn Veng Branch YMA ten hnatlang leh thil tul ang te ngaihtuahin Bialtu MLA leh Assembly Deputy Speaker, Er. Lalrinawma chuan In chung tur rangva a ngaihtuah sak bawk a ni.