Latest News

Mizoram Governor in Lunglei khawpui a tlawh

Mizoram Governor, PS. Sreedharan Pillai chuan chuan nimin khan Lunglei tlawhin sawrkar Department hotute leh tlawmngai pawl hruaitute a kawm.

Governor in Helicopter hmanga Lunglei hi thlengin Kawmzawl Helipad-ah Lunglei Bawrhsap, Kulothungan A leh SP bakah sawrkar mi pawimawh ten an lo dawngsawng a, Lunglei Circuit House pan nghalin hetah hian sawrkar Department hotute nen inkawmna an nei nghal a ni. He hunah hian Governor chuan ‘Mizoram 2nd Capital’ ti a hriat lar Lunglei khawpui tlawhna hun tha tak a nei thei chu lawmawm a tih thu sawiin, District ti hmasawn zel tura hmalak tul te leh harsatna awmte zirchiang tur leh sawrkar hnathawkte leh khawtlanga mi pawimawh te kawm tura kal a nih thu a sawi bawk.

He hunah hian Lunglei Deputy Commissioner, Kulothungan A chuan Lunglei District chanchin, dinhmun leh hmasawnna hna kal mek te a sawifiah a, Lunglei District SP, Rex Zarzoliana Vanchhawng pawhin Lunglei District-a dan leh thupek kenkawh chungchang leh venhimna kalpui dan tlangpui sawifiahna hun a hmang bawk a. Inkawmhona hun hman chhunzawm niin Head of Office thenkhat ten an Department hmalakna pawimawh leh harsatna neihte Governor hnenah hian an lo thlen a ni.

Hemi hnu hian Governor hian tlawmngai pawl leh Political party hruaitute kawm nghalin harsatna an neih hrang hrangte an lo thlen ve bawk a, hemi hnu hian Governor leh amah zuitute chuan hnuchham enkawlna hmun Bethel Centre, Chhumliankawn an tlawh a. Bethel Centre hi kum 2003-ah bultan niin tun dinhmunah naupang 100 (mipa 54 leh hmeichhia 46) an cheng mek a. Bethel Centre Management Committee-in enkawlin thawktu mi 13 an awm mek a, heng zingah hian sawrkar laipui Ministry of Women & Child Development kaltlanga rawih Counselor pahnih, Case Worker pahnih leh Paramedical Staff pakhat an tel a ni. Bethel Centre-ah hian Primary School leh Middle School kalpui mek anih bakah a hmuna cheng naupangte hian Puantah, Puanthui, Electrical Wiring, Mobile Reparing leh thiamthil dangte zir chhuakin eizawnna ah an hmang chhunzawm chho mek a ni.

Governor leh amah zuitute hian Christian Hospital Serkawn pawh an tlawh bawk a,  Christian Hospital Serkawn hi kum 1923-a din niin tun dinhmunah khum 100 a awm mek a. Christian Hospital Serkawn-ah hian Doctor 11 leh Staff 183 an awm a, Christian Hospital Serkawn hnuaiah hian Nursing School a awm bawk a ni. Hemi hnu hian Governor hian Helicopter hmangin Aizawl a pan leh nghal a ni.

Comments

Chhiar Hlawhte