Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

COVID-19 kai hmuh thar zinga mi in nunna a chan

Niminpiah khan Mizoram-ah Sample 650 enfiah niin COVID-19 hri kai mi pathum hmuhchhuah an ni a, hri kai hmuhchhuah zinga mi pakhat chu nizan hmasa khan a boral zui nghal.

Niminpiah khan ZMC Laboratory-ah Sample 26 enfiah niin heng atang hian COVID-19 hri kai mi pakhat hmuhchhuah niin Aizawl District mi a ni a, hri kai hmuhchhuah tawh nen chhungkaw khat-a khawsa an ni. Niminpiah-a hri kai hmuh dang mi 2 te hi Rapid Antigen Test hmanga Sample enfiah 624 te atanga hri kai hmuhchhuah niin Aizawl District-a hri kai hmuhchhuah ve ve an ni a, pakhat hi tualchhung-a hri inkaichhawng leh hri kaina hriatloh niin pakhat hi tunhnaia State pawn atanga rawn haw leh Negative Certificate nei, a hnua taksa a hri kai lanchhuahna nei a ni.

Niminpiah-a COVID-19 hri kai hmuhchhuah zing pakhat hi hri a kai tih hmuhchhuah a nih hnu nizan hmasa dar 11:40 khan a boral zui a. Thudawn danin hri kai nunna chan hi Ratna Gurung (54) niin March 11, 2021 khan Silchar atanga rawn haw in March 6, 2021 khan Silchar-ah Rapid Antigen Test hmanga Sample enfiah niin hri a kai lo tih chuanna lehkha a nei a. Amaherawh chu Aizawl a rawn thlen hnuah taksa-a hri kai lanchhuahna a neih avangin niminpiah khan damdawi In pakhat-ah inentir tura kalin hetah hian hri a kai tih hmuhchhuah a ni a, nizan hmasa khan SRF-ZMC ah dahluh nghal ni mah se zan dar 11:40 vel khan a boral zui ta a ni. Ratna Gurung hi BP sang nei sa niin Pneumonia a kai hman nia thudawn a ni.

Nimin khan Mizoram-a COVID-19 hri kai enkawl mi 4 te chu hri lakah fihlimin anmahni enkawlna hmun atanga chhuahtir leh an ni a, heti hian nimin tlai dar 5:00 thleng khan Mizoram-a COVID-19 hri kai hmuhchhuah tawh chu 4445 niin heng zinga 4421 te chu enkawl dam an ni tawh a, hri kai hmuhchhuah atanga za zela 99.46 te chu enkawl dam ni tawhin tunah hian hri kai enkawllai 13 an la awm a, hri kai zingah nunna chan mi 11 an awm ta a ni.

Comments

Popular News (Last 30 Days)