Phatsantu hremna phatsan lo tu chungah a letling in hman a ni - Lalduhoma

Zoram Peoples’ Movement (ZPM) chuan Serchhip bial Assembly bye-election neih tur atana Campaign hawnna leh Official Candidate puanna hun Inrinni khan Serchhip-ah an nei a, he hunah hian an Candidate, Lalduhoma chuan Phatsantu hremna chu phatsan lo tu chungah a letling-a hman a nih thu a sawi.

Serchhip Bazar-a ZPM Campaign hawnna leh Official Candidate puanna hunah hian Serchhip bial-a ZPM Candidate, Lalduhoma chuan kum 2018 MLA inthlanpui-ah khan vanneihthlak taka Bial hnih atanga thlantlin a nih thu sawiin, pakhat chhuahsan a ngaih tak avangin thutlukna siam harsa tak a nih thu leh tehna hrang hrang atanga teh chuan anmahni awmna, Aizawl West-I chu thut zui tura ngaih a nih laiin ZPM Policy a tak taka kalpui theihna tur atana remchanna nei chu Serchhip Bial a nih avanga thlangin, he Bial hian Development thil-ah a hip na ta em em tih a sawi a. Ramlai malsawmna kan chan ho theihna tur Bial a nih te beiseiin, theih ang tawkin MLA Fund te hmanga bul tanin Opposition MLA ni chunga hmalak theihna kawng hrang hrangte dapin an sawrkar huna he Bial an chei dan tur te pawh hmachhawp engemaw zat an nei tih a sawi bawk a. Chutiang a nih lai chuan MLA atanga ban a nih thu sawiin, amah ban a nih chungchangah phuba lakna thinlung pu lo tura mipuite chu chahin, Pathian kut-a dah mai chu a tawk tih a sawi bawk.

ZPM Official Candidate, Lalduhoma chuan Anti-Defection Act chu mahni thlangtu Party phatsana, a thlang ve lo tu Party-a lut te hremna, phatsantu leh uire hremna a ni tih sawiin, he Dan in a tum ber chu mahni pawl phatsantu hrem a ni tih a sawi a. Chutiang chuan amah pawhin ZPM phatsanin Congress emaw, MNF-ah emaw lut sela chuan hrem theih a ni tih a sawi a. Amaherawh chu phatsantu hremna dan chu phatsantu ni si lo chungah lek a ni tih sawiin, “Inthlan lai-a min vote tu te zawng zawng kha a mal malin zawt chhuak vek ta ila, ‘Ka phatsan che em?’ ti ila, ‘Min phatsanlo’ in tih vek ka ring,” tiin Dan chu a letling-a hman a ni ta tih a sawi a. Amah an hek khan ZPM phatsan-a Party dang-a lut tiin an hek dawn emaw a tih laiin ‘A ZPM lutuk, ZPM ber ang ziazang in a khawsa’ tih chu an hekna a ni ta zawk tih a sawi bawk.

Mizoram People Forum (MPF) kaih-hruaia he hun hman ah hian sawmbik te atangin Vanlalhlana MLA pawhin thu sawiin Lalduhoma chu ZLP Leader a nih thin thu leh Lalduhoma chuan sawrkar hna lian tak a vawn chu bansanin politics-ah a lut tih a sawi a. Politics-a a luh dawn hian tih tur pahnih a intuk tih sawiin, pakhatna ah chuan Mizoram-ah remna leh muanna thlentir a ni tih a sawi a. A inpekna leh thawhrimna zarah India sawrkar leh MNF te chuan Remna thuthlung ziakin Mizoram-ah remna leh muanna a lo awm ta tih a sawi a.

Pahnihna ah chuan Mizoram mipuite retheihna sal ata hruaichhuah a ni tih pawh sawiin, “Hei hi a hmabak hlenchhuah tur niin Pathian in rem a tih chuan kum 2023 kumtawp-ah khian a hna a tan theih a beisei ang,” a ti a. Tunah hian kan ram in a mamawh ber chu Opposition chak a ni tih pawh sawiin, Lalduhoma thlantlin a nih chuan Opposition an chak lehzual dawn tih a sawi a, chu chu kan ram in a mamawh dik tak a ni tawh tih a sawi a. “Sawrkar tha nei tur chuan Opposition tha tak neih a ngai a ni,” tiin kan ram in a mamawh em em Opposition chak lehzual kan neih theih nan Lalduhoma lo Vote turin mipuite a sawm bawk.

Inrinni-a he hun hmanna ah hian ZPM Vice President, K. Sapdanga chuan Campaign hawnna neiin ZPM Vice President bawk, Lalthansanga chuan an Candidate tur puanna leh inhmelhriattirna hun a hmang a, anni bakah hian Val Upa Council (VUC) leh ZPM PAC Member te pawhin thu an sawi bawk a ni.