Raltlante tha taka dawngsawng turin YMA in ngen

Central YMA chuan Myanmar raltlan Mizoram-a lo lut te tha taka lo dawngsawng turin Sub-Hqrs./Group/Branch YMA te a ngen.

Central YMA hian Inrinni zan khan Aizawl-ah CEC thutkhawm neiin Myanmar raltlan Mizoram-a lo lutte chungchang hi an ngaihtuah a, Sub-Hqrs./Group/Branch YMA te chu an huamchhunga raltlante tha taka lo dawngsawng tur leh mumal taka chhinchhiahna lo siam tura ngenin, report form siam a Central YMA-ah thehlut turin an hriattir a ni.

Hei bakah hian CEC thukhawm chuan tunhnaiah Mizoram chhungah ruihhlo a hluar leh tak em avangin theihtawpa ruihhlo do tura tanlak thar an remti a. Riverine Forest Reserve thiah chungchang Chief Minister an lo sawipui tawh chu a tul anga bawhzui zel an rel bakah Aizawl khawpui chhung Branch YMA hruaitute infuihtharna leh YMA kalphung inzirtirna hun buatsaih tha an ti bawk. Central YMA hian T-Dumzau khuaa In kang avanga hnatlang thingpui lum nan Central YLA-ah Rs. 10,000 pek nise an ti bawk.