Latest News

INC in bye-election Campaign hawnna an nei

Ruling Wave a awm theilo - PC. Tlana

Indian National Congress (INC) chuan Serchhip bial Assembly bye-election neih tur atana Campaign hawnna chu nimin khan Serchhip-ah an nei a, he hunah hian INC Candidate, PC. Laltlansanga chuan tun tum bye-election neih turah Ruling Wave a awm theilo tih a sawi.

Serchhip Bazar-a Indian National Congress (INC) in Assembly bye-election neih tur atana Campaign hawnna an neih ah hian an Candidate, PC. Laltlansanga chuan tun tuma Serchhip bial-a Assembly bye-election lo awm tur chu bye-election lo neih tawh te nen a inang lo tih sawiin, bye-election neih tawh thin te chu Chief Minister bial 2-a an tlin avanga an bial chhuahsan leh sawrkar tan tirh, Chief Minister bial chhuahsan a nih thin avangin Opposition tan chet lak ngaihna a awm thin lo tih a sawi a. Amaherawh chu tun tumah chuan tun tumah chuan sawrkar dinglai chu sawrkar tantir an ni tawh lova, kum hnih leh a chanve chauh hun an nei tawh a, chuvangin Ruling Wave a awm thei tawh lova, sawrkar kal mek chu ram rorelna kawngah an thawh that loh avangin neutral support an nei thei tawh lova, chuvangin by-election dang nen a inang thei lo, tiin Ruling Party chu Candidate chungchangah pawh a buai ber an nih thu leh an Candidate pawh a duh thlan hmasak ber a nih loh thu a sawi.

PC. Laltlansanga chuan Serchhip bial hmasawnna tur atan hmathlir hrang hrangte a lo neih tawh thin thu sawiin, Congress sawrkar in Serchhip khawpui chawmna atana Tui lakna an lo siam tawh chu tunah chuan a hlui tawh avangin Phase-II siam chu ngaih pawimawh a nih dawn thu leh, MLA-ah thlantlin a nih chuan MLA Fund atangin Serchhip Tuizemdumkawn-ah sawrkar in ram a pek theih chuan Fire Department tan Out-Post siam a nih dawn thu te a sawi a, MLA Fund chu kuthnathawktute tan tangkai thei ang bera hman a nih dawn thu te pawh a sawi bawk.

Serchhip bial-a ZPM Candidate-in tun tum bye-election-a hlahthlem tura Congress a ngenna chhangin, kum 2003-a Tlungvel bial atanga thlan tlin Sainghaka a boral avanga bye-election neihah Lalduhoma kaihhruai ZNP khan ‘Congress bial ruak a ni a, kan kian ang che u,’ ti lovin a hranin candidate an siam ve tho a, chuvangin tunah pawh hian Congress chu an hai thei bik lo tih a sawi a, anmahni paihtute laka thinrim em em ZPM-te chu phuba an laksak dawn tih a sawi bawk. 

He hunah hian MPCC President, Lal Thanhawla pawhin MNF sawrkar chu tuna an kalphungah khalh ngil ngai a nih avangin, a nawr huai leh chak deuh turin mi hrat khawkheng PC. Laltlansanga chu Serchhip bial by-election lo awm turah an party candidate atana an ruat thu a sawi a. Lal Thanhawla chuan, an party hotu te'n bengsik-a Pathian rawn chunga ngaihtuahna an sen hnuah, Serchhip bial leilung fa ngei, zirlai hruaitu a lo ni tawhna atanga chhut kirin PC. Laltlansanga chu an candidate atana an ruat thu a sawi bawk.

MPCC President Lal Thanhawla chuan PC. Laltlansanga chu eptu MLA atan hian a tha lehzual ang tih an ngaihtuah thu sawiin, Congress party candidate hi tun tum inthlanah thlantlin a nih chuan Serchhip bial in bial leilung fa ngei MLA neihna hmasak ber a nih dawn avangin party pawh sawi loa vote turin khawngaihna a ngen nghal bawk.

Nimin-a INC in Serchhip-a bye-election Campaign hawnna hun an buatsaih hi MPF Serchhip District kaihhruaina hnuaia neih niin he hunah hian MPCC Vice President, Lalsawta pawhin an Candidate, PC. Laltlansanga chu mihrat khawkheng a ni tih sawiin, tun tum bye-election-a thlantlin a nih chuan Congress MLA neih sa 5 awmte belhin Congress mi pawimawh 6-te zingah a tel dawn tih a sawi a, hei hian 2023 inthlanpuiah pawh kawngro a su hle dawn a ni, a ti a. Ai-zawl atanga an Party hruaitu rawn kal dang te pawhin thu an sawi bawk a ni.

Comments

Chhiar Hlawhte