Main Trunk Line-ah kawng chhawng siam vek tum

Aizawl khawpui chhunga kawng lun zual lai, Main Trunk Line-ah kawng chhawng siam vek tum a ni tih Chief Minister, Zoramthanga chuan sawiin, COVID-19 hri leng vangin hmalak erawh a chak thei lo tih a sawi.

Assembly Budget Session neih mekah Lalrintluanga Sailo zawhna kal zela Lunglei North bialtu MNF member, Dr. Vanlaltanpuia zawhna a chhannah Chief Minister, Zoramthanga chuan Aizawl khawpui chhungah chhawng siam tuma hmalak mek a nih rualin vawi leh khat-a leihlawn va dawh ang ngawt a ni lo tih a sawi a ni.

Chief Minister chuan, Bawngkawn leh Vaivakawna Fly Over siam tur pawh chak taka hmalak ni mah se, a ringrek a te lutuk a, a ban phunna tur pawh a buaithlak avangin chak taka hmalak a har tih a sawi a. Vaivakawn bikah chuan Vaivakawn Field tawp-ah ban phunin In sa se, chu chu kawngpui an-a In neituten luah mai se, an In chu kawngpui atan pe se tih ruahmanna an siam a, hei hi a in neitute pawhin a thuphungin an pawm tawh tih sawiin, Bawngkawn-ah pawh a tih theih dan a awm em tih ngaihtuah mek a ni, a ti. Chief Minister chuan, Aizawl khawpui helna, By Pass Road siam turin State khawpui Four Lane-a pawh vek tura hmalakna hnuaiah Sairang lam atanga kawng lo kal tur chu Bawngkawn Brigade Field hnuaiah luh turin, heta tang hian Bawngkawn hnuaiah verh tlangin Chite hnar-a chhuah tir an rilruk thu a sawi bawk.