Chanchin thar thenkhat :

Hri kai hmuh belh awmlo

Niminpiah khan Mizoram-ah Sample 694 enfiah niin heng atang hian COVID-19 hri kai hmuh thar an awm lova, heng Sample enfiah te hi ZMC Laboratory-ah 77, District hrang hranga TrueNat Laboratory-ah pakhat leh Rapid Antigen Test hmangin Sample 616 te an ni. Nimin khan Mizoram-a COVID-19 hri kai mi pakhat chu hri lakah fihlimin anmahni enkawlna hmun atanga chhuahtir a ni ve leh a, heti hian nimin tlai dar 5:00 thleng khan Mizoram-a hri kai hmuh tawh chu 4434 niin heng zinga 4416 te chu en-kawl dam an ni tawh a, hri kai hmuhchhuah te atanga za zela 99.59 te chu enkawl dam ni tawhin tunah hian hri kai enkawllai 8 an la awm a, Ai-zawl leh Saitual District chiah hri kai enkawl an ni.

Bank hmalakna thlirho

Nimin khan Lawngtlai-ah District Consultative Committee (DCC), District Level Review Committee (DLRC) leh District Level Security Committee (DLSC) thutkhawm neih a ni a, he hunah hian Bank hrang hrangte hmalakna thlir niin pawisa thir, a bikin Rs. 10 thir hman a harsat chungchang leh dawrkaite'n an dawn duhloh thin chungchanga harsatna awm sutkian dan tur sawiho a ni a. Cheng 10 thir chu sawrkarin hman theih tura a siamchhuah a nih avangin dawn leh hman a hlauhawm loh thu tarlan niin, Bank lamin pawisa thir an dawng duhlo thin nia sawi chu thil hriat chian loh vang a ni a, tumkhata dawn theih zat bithliah awmin an dawn reng thu Bank lam hotute chuan an sawi bawk.

MLA Fund pekir then leh

Mizoram-a COVID-19 hri leng chuan zia-awm lam a pan zel nia hriat a nih avangin Hrang-turzo bialtu MLA Lalchamliana, Tawi bialtu MLA R. Lalzirliana leh Aizawl East-II bialtu MLA Robert Romawia Royte ten COVID-19 dona atana MLA Fund atanga Rs. 50,00,000/- theuh an thawh tawh atangin cheng nuai 25 theuh chu Assembly Constituency awmna Deputy Commissioner hnenah pek kir leh a ni.

Minister pahnih te sum demand House-ah pawm

Mizoram Assembly thutkhawm neih mekah nimin khan Minister pahnih te Department chan enkawlna tura sum ruahman chu pawm a ni. Nimin a Minister pahnih demand pawm te hi Minister Lalchamliana Department 3 enkawlna tur sum ruahman a vaiin Rs. 844,43,66,000 leh Minister Robert Romawia Royte enkawl Department 3 tana sum ruahman Rs. 41,10,36,000/- te a ni. Vawiin hian thutkhawm hi neih leh tur a ni dawn a, Private Member Resolution sawiho tur niin Minister te Demand erawh sawiho a ni dawnlo thung a ni.