Latest News

Serchhip District-ah thla hnih chhung hri kai thar hmuhchhuah an awm tawhlo

Serchhip District chhungah thla hnih (2) chhung COVID-19 hri kai hmuhchhuah an awm tawh lo a, kumin January 20 hnu lamah Serchhip District-ah hian COVID-19 hri kai hmuhchhuah awm tawh lovin Serchhip District atang hian COVID-19 hri kai mi 413 enkawl dam an ni tawh thung.

Serchhip CMO Office atanga thu kan dawn danin kumin January 20 khan Serchhip District-ah hian COVID-19 hri kai mi pakhat hmuhchhuah niin hemi hnu hian hri kai hmuhchhuah hi an awm belh leh tawh lova, nimin thlenga hri kai hmuhchhuah an awm belh tak loh avang hian thla hnih (2) chhung chu Serchhip District-ah hian COVID-19 hri kai hmuhchhuah an awm tawh lo a ni. Nikum March thla atanga Mizoram in COVID-19 hri leng a buaipui hnuah Serchhip District-ah hian May 28, 2020 atangin Sample lak leh enfiah hna thawh chhoh ve tan a ni a, hemi atanga nimin thleng khan Serchhip District atangin ZMC Laboratory-ah RT-PCR hmanga enfiah tur Sample 1137 thawn ni tawhin heng atang hian COVID-19 hri kai mi 11 hmuhchhuah an ni a, nikum September 10-a Serchhip District-a TrueNat Laboratory hawn a nih hnuah he Laboratory atang hian Sample 2591 enfiah ni tawhin COVID-19 hri kai 113 hmuhchhuah an ni tawh bawk a, Rapid Antigen Test hmanga Sample 3218 enfiah atangin COVID-19 hri kai mi 56 hmuhchhuah an ni tawh bawk a, heti hian nikum May 28 atanga nimin thlengin Serchhip District-ah Sample 6946 enfiah ni tawhin COVID-19 hri kai mi 180 hmuhchhuah an ni tawh a ni.

Serchhip District-a COVID-19 hri kai hmuhchhuah mi 180 te atang hian mi 179 te chu enkawl dam niin hri kai hmuhchhuah pakhat erawh in nunna a chan thung a, hri kai nunna chan hi Rapid Antigen Test hmanga hri kai hmuhchhuah niin Thenzawl mi a ni a, hri kai hmuhchhuah atanga za zela 99.44 te chu enkawl dam an ni.

Hetihlai hian Serchhip District-a hri kai enkawl zinga enkawl dam tawh zawng zawng chu mi 413 an ni thung a, Serchhip District-a hri kai hmuhchhuah mi 179 te bakah hian BSF Sipai leh District dang atanga hri kai enkawl tur Serchhip District-a rawn dah mi 234 te chu enkawl dam an ni bawk a, an zinga mi 55 te chu Civil mi, District dang-a hri kai hmuhchhuah leh enkawl tura Thenzawl-a rawn dah te an ni.

Comments

Chhiar Hlawhte