Ni khat-ah COVID-19 hri kai mi 6 hmuh leh an ni

Niminpiah-a Mizoram-a Sample enfiah 719 te atangin COVID-19 hri kai mi 6 zet hmuhchhuah leh an ni a, a tam zawk te chu tunhnaia State pawn atanga rawn haw an ni.

Niminpiah khan ZMC Laboratory-ah Sample 20 enfiah niin hri kai mi pakhat hmuhchhuah a ni a, hri kai hmuh tawh nen inkawmhnaih avanga inkhunghrang lai a ni. Niminpiah a hri kai hmuhchhuah dang 5 te hi Rapid Antigen Test hmanga Sample enfiah 695 atanga hri kai hmuhchhuah niin Seling-ah pafa hri kai hmuh niin tunhnaia State pawn atanga rawn haw, an haw hlim-a Sample enfiah atanga hri kai lo, taksa-a natna lanchhuahna neih avanga enfiah leh an nih hnua hri kai tih hmuhchhuah te an ni a. Aizawl Ramhlun North-ah mipa pakhat, Salem Veng-ah mipa 2 leh Chaltlang-ah hmeichhia pakhat hri kai hmuhchhuah niin heng te hi an vaiin tunhnaia Guwahati atanga rawn haw te vek an ni.

Nimin khan Mizoram-ah hri kai mi pakhat enkawl dam leh niin nimin tlai dar 5:00 thlenga Mizoram-a hri kai hmuhchhuah chu 4460 an tling ta a, hri kai zinga 4426 te chu enkawl dam ni tawhin hei hi hri kai hmuhchhuah atanga chhutin za zela 99.23 an ni a, tunah hian hri kai enkawllai 23 la awmin hri kai zingah nunna chan mi 11an awm tawh bawk a ni.