Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Buh leh bal thar tam a nih theih nan kawng hrang hrangah hmalak a ni - Agriculture Minister

Agriculture Minister, C. Lalrinsanga chuan Mizoram-ah buh leh bal thar tam a nih theih nan leilet siam belh anih bakah kawng hrang hrangah hmalak a nih thu a sawi a. Leilet enkawlna atan Tractor leh Power Tiller te chu mamawh a nih avangin sum a awm chuan pek zel tum a nih thu a sawi bawk.

Mizoram Legislative Assembly Session neih mekah Champhai North bialtu MLA, Dr. ZR. Thiamsânga zawhna chhangin, Agriculture Department changtu Minister, C. Lalrinsanga chuan, sawrkar tharah buh leh bal thar tam zawk a nih theih nan Agriculture Department-in hmalakna hrang hrang a neih thu a sawi a. Heng hmalakna zingah hian buh tharchhuah a pun theih nan leilet siam belh a nih thu te, loneituten hlawk zawka buh leh bal an tharchhuah theih nan khawl tha hman tangkai tirin, subsidy-a khawl pek an nih thu te, thlai chi tha leh thar hlawk an chin theihna tura ruahmanna an siam sak thute, thlai enkawlna atana tangkai leitha chi hrang hrang loneituten an hman theihna tura ruahmanna an siam thu bakah thlai chin dan leh enkawl dan te loneitute an zirtir thin thu a sawi a ni.

Leilet enkawlna atana loneitute hnena Tractor leh Power Tiller an pek zat zawhna pawh Agriculture Minister chuan a chhang bawk a. Minister chhan danin, kum 2018-19 khan Tractor 27 leh Power Tiller 100 pekchhuah a ni a, kum 2019-20 ah Tractor 50 leh Power Tiller 150 pekchhuah leh a ni bawk. Agriculture Minister, C. Lalrinsanga chuan, hun lo kal leh zel turah Tractor leh Power Tiller te chu leilet enkawl nan mamawhna a la awm zel avangin sawrkar laipui leh State sawrkar atanga pekna tur Scheme leh sum a awm chuan pek zel tum a nih thu a sawi bawk.

Agriculture Minister chuan kuthna-thawktute tana subsidy-a pek thin tui lakna, Polythene pipe chu tun aia kut hnathawktu ten an indaih zawk nan kawng hrang hrangin hmalak mek a nih thu leh hemi atan hian CSS hnuaiah proposal te siam niin, NEC hnuaiah project siam ah pawh telh a nih thu House a hrilh bawk.

Comments

Chhiar Hlawhte