Nikum chhungin Serchhip ICTC-a thisen enfiah atanga za zela 2.44 in HIV hrik an kai

Kum kalta (2020) chhung khan Serchhip District-ah mi 2169 te thisen enfiah atangin HIV hrik pai mi 53 hmuhchhuah an ni a, Sample enfiah atanga za zela 2.44 te chuan HIV hrik an kai a ni.

Serchhip District Hospital ICTC-a thawktute hnen atanga thu kan dawn danin nikum (2020) chhung khan hri leng avangin harsatna thleng mah se mi 2169 te thisen enfiah niin heng atang hian HIV hrik pai mi 53 hmuhchhuah an ni a. Heng thisen enfiah te hi General-ah mi 1457 niin heng atang hian HIV hrik pai mi 48 hmuhchhuah an ni a, nu naupai mi 712 te thisen enfiah niin HIV hrik pai mi 5 hmuhchhuah an ni bawk.

Nikum chhung khan hri leng avangin April thla atanga June thla thlengin thisen enfiah hi Serchhip-a ICTC-ah hian a tam lo hle a, amaherawh chu kumtluan a chhut erawh chuan thisen enfiah atanga HIV hrik pai hmuhchhuah erawh an tam hle thung a ni.

Chhinchhiahna atanga a lan danin nikum hmasa (2019) aiin nikum khan Serchhip District-ah thisen enfiah thahnem zawkin HIV hrik pai hmuhchhuah erawh an tlem thung a, kum 2019 khan Serchhip District-ah mi 1966 te thisen enfiah niin heng atang hian HIV hrik pai 64 hmuhchhuah niin thisen enfiah atanga za zela 3.25 te chuan HIV hrik hi an pai a ni. Serchhip ICTC-a thawktu te chuan HIV hrik kai pung chak lutuk ti nep tura mipuite kan tanrual a tul thu an sawi bawk.