Latest News

Kum upa te hri danna pe dawn

Nimin khan Serchhip-ah District Task Force on COVID-19 Vaccination chu thukhawmin kum upa leh natna benvawn nei te hnena COVID-19 hri danna pek beihpui thlakna, CoWIN-2.0 chu Vawiin atangin Serchhip District-a hmun 6-ah kalpui nise an ti.

Serchhip District Task Force on COVID-19 Vaccination thutkhawm Serchhip DC Meeting Hall-a neih hi Addl. DC, Lalmuansanga Ralte chuan kaihruaiin Serchhip District-ah COVID-19 vaccine tluang taka pek chhoh zel a nih thu sawiin, Medical Team thawktute inpekna ah lawmthu a sawi bawk.

Sawrkar laipui ruahmanna COVID-19 vaccine thawh hnihna, CoWIN 2.0-ah hian khua leh tui kum 60 leh a chunglam zawng zawng leh kum 45 leh kum 59 inkar, bawrhsawmna neuh neuh (Comorbidity) nei te tan a thlawnin vaccine pek leh tur a ni a. He vaccine pek thawh hnihna hi Serchhip-ah pawh Vawiin, March 3, 2021 atanga kalpui ve tura rel a ni a. Hmun paruk-ah vaccine pekna tur siam a ni anga, VLTF te nena tangkawpin veng tina kum 60 leh a chunglam zawng zawngte leh kum 45 leh 59 inkar, bawrhsawmna dang nei, vaccine pek hma ngai, doctor lehkha nei te chu vaccine hi pek an ni dawn a ni.

Vaccine lak dan tur indawt hi Medical lama thuneitute leh VLTF ten an duang anga, Veng chhung tlangau hmanga inhriattir a ni thin dawn a. Kum 45 leh 59 inkar bawrhsawmna nei, vaccine lak hma ngaite finfiahna Medical Certificate inpek dan tur pawh ruahman thuai a ni ang.

He hunah hian Dr. Lalhlunpuii, SMO chuan Serchhip District-a COVID-19 vaccine an pek tawh dan tarlangin, Health Workers mi 697 te chu 1st Dose pek niin chung zinga mi 423 te chuan 2nd Dose pawh an la fel leh tawh a, midangte pawhin 2nd Dose hi an la chho mek a. Frontline Workers dang- Police, VLTF, BSF leh Assam Rifles te pek zui leh niin nimin thlengin mi 1428 in 1st Dose an la leh tawh bawk a ni.

Comments

Chhiar Hlawhte