Latest News

Engineering College-a Class tan thei turin sum la ngai tam

Higher and Technical Education Minister, Dr. R. Lalthangliana chuan Lunglei-a Engineering College-ah Class tan thei turin cheng vbc. 11 vel mamawh a ni tih a sawi.

Assembly thut-khawm neih mekah Aizawl South-I bialtu MLA, C. Lalsawivunga zawhna leh zawh belhna dangte a chhanna ah Higher and Technical Education Minister hian, Lunglei-a Engineering College-ah hian Building mamawh hrang hrang sak zawh ni tawh mah se, a panna kawng mumal a la awm lova, kawlphetha leh tui pawh pek a la ni lo tih a sawi bawk.

Dr. R. Lalthangliana chuan Lunglei-a Engineering College hi zirtirtu lakna tur Provision awm lo a nih bawk avangin thil tihfel ngai tam tak a la awm tih a sawi a, hemi piah lamah hian thawktute chenna tur pawh sak a la ni lova, heng mamawh hrang hrang siam nan hian cheng vbc. 11 vel mamawh a ni a, COVID-19 hri leng vanga sum leh pai-ah harsatna a thlen mek bawk si avangin heng mamawhte hi buaipui theih a la ni rih lova, Class pawh tan theih a la ni rih lo tih a sawi a ni.

H&TE Minister, Dr. R. Lalthangliana chuan kum 2019 December thla-a Human Resource Development Ministry atanga Lunglei-a MZU Southern Campus din phalna an hmuh angin MZU Southern Campus hi a tirah chuan Lunglei Engineering College nen suihfin a, hmun khata Class kalho thei tura beisei a ni tih a sawi bawk.

Dr. R. Lalthangliana'n House a hrilh danin, tunah hian Sawrkar enkawl College-ah zirtirtu sanction post 876 a awm mek a. Zirtirtu hi a ngheta thawk 637 awmin, Contract-a thawk 147, Casual a thawk 100 leh Part-Time Lecturer 47 an awm mek a. Tunah hian Lecturer post ruak 92 awmin, sum harsat vangin hnawhkhah mai theih a la ni rih lo a ni.

Comments

Popular News (Last 30 Days)