Chanchin thar thenkhat :

Dhaka-ah Dr. Thangtea zin

Commerce & Industries Minister Dr. R. Lalthangliana chuan Inrinni khan Bangladesh khawpui Dhaka-a thilsiamna hmunpui thenkhat a tlawh a, heng factory te hian tha takin an lo dawng-sawng a ni. Dr. R. Lalthangliana chuan Dhaka-a thawmhnaw siamna hmun lian tak, ABS Fashion Ltd. tlawhin, an factory hnathawh dan te leh thil siamchhuahte a en a, he factory-ah hian thawktu 3000 chuang an awm a, Europe leh khawvel hmun hrang hrangah an thilsiam hi an thawnchhuak a ni. Hemi hnu hian plastic bungrua chi hrang hrang siamna hmunpui, Bengal Polymer Wares Ltd. tlawh lehin plastic hmanga thilsiam chi hrang hrang a en leh a, he factory-ah hian mi 2000 chuang thawkin ram hrang hrang 60-ah an thilsiam te an thawnchhuak mek a ni. Heng factory te thil-siamchhuah zingah hian India leh Mizoram-ah pawha kan lo lei leh hman mek tam tak a tel a ni. Inrinni zing khan Dr. R. Lalthangliana leh Bangla-desh-a Zofa awm te chuan inkawmna an nei bawk.

NCC Mizo Bn. dinna tur tlawh

Sports Minister, Robert Romawia Royte chuan Inrinni khan Lunglei Sazaikawn-a NCC 2nd Mizo Batallion thar Office hmun tur a tlawh. Kum 2019-a Cabinet Meeting in a lo rel tawh angin Lungleia- NCC dinna tur atan hian Defence Ministry pawhin phalna a pe tawh a, hemi tihpuitlinna tura hmalak dan tur chungchang hi Sports Minister chuan NCC hotute leh Sports Department Commissioner & Secretary te nen a hmunah sawiho in April 2021 chhung hian engkim tifel in, May ni 1, 2021 atangin Office luah lut thei turin an rel a ni. 2nd Mizo Bn. NCC hian District 5- Lunglei, Lawngtlai, Siaha, Hnahthial leh Serchhip District te an enkawl dawn a ni.

YMA-ah Morgue Van hlan

Kolasib District chhunga Assembly Constituency pathum- Tuirial, Kolasib leh Serlui-a MLA ten sum thawhkhawm hmanga ruang phurhna tur Motor, Morgue Van an lei chu Inrinni khan Kolasib Sub-Hqrs. YMA kutah an hlan.

World Oral Health Day

Khawvel hmun hrang hrang leh ramchhung hmundang te rualin Inrinni khan Mizoram-ah ‘World Oral Health Day’ hman a ni a, Aizawl Vanapa Hall-a he ni puala hun hman chu Health and Family Welfare Board Vice Chairman, Dr. ZR. Thiamsanga MLA chuan hmanpuiin Ka chhung hrisel neih a pawimawh thu a sawi a. Khawvel-ah kumtin mi maktaduai khat zet Ka chhung Cancer an awm ziah thu te, India ramah mi nuai khat zelah Ka chhung Cancer mi 20 zel an awm thu te sawiin, Ka chhung Cancer thlentu hrang hrang zuk leh hmuam, vaihlo leh a kaihhnawih hrang bakah kuhva thleng a sim a that thu a sawi bawk.

CM in lungphum a phum

Sports & Youth Services Department kaltlanga Pradhan Mantri Jan Vikas Karyakram (PMJVK) hnuaia sum hmuh hmanga State Sports Academy, Zobawk, Lunglei-a Residential Sports School sakna lungphum chu Zirtawpni khan Chief Minister, Zoramthanga chuan a phum a, a sakna tur hi cheng nuai 3430.98 approve tawh niin, 1st Installment cheng nuai 1543.94 dawn a ni tawh a, mipa leh hmeichhia 100 ve ve awm theihna tur Hostel leh infiamna hmunhma te siam a ni ang.