Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Zokhawthar-ah sawrkar phal loh Item tih loh insumdawntawnna atan kalpui theih a ni

Commerce & Industries Department changtu Minister, Dr. R. Lalthangliana chuan Indo-Myanmar Border Trade, Zokhawthar Trade Point bikah Normal Trade hman a nih avangin sawrkar phal loh Item tih loh chu eng Item pawh insumdawntawnna atan kalpui theih a nih thu House a hrilh.

Nimin-a Assembly Session-ah VL. Zaithanzama zawh belhna chhangin Dr. R. Lalthangliana chuan, Zokhawthar bikah hian insumdawntawnna tihchangtlunna atan hian sawrkar laipui atangin cheng vbc. 15 ruahman a nih thu leh, hei hi tihfel hnai a nih tawh thu a sawi a. Hun reilote chhungin a theih ang angin hna thawh bul tan tum a nih thu sawiin, chumi a nih chuan kawng hrang hrangin hmasawnna hmuh theih a nih tur thu a sawi a. Indo-Myanmar insumdawn tawnna atan hian remchang tur a awm nual tih sawiin, nikum lamah pawh Covid-19 hri leng karah pawh a theih ang anga hmalakna neih a ni thu a sawi a. Myanmar lam nena indawrna neih tan chhoh mek a nih laiin, sipai sawrkar ina harsatna engemaw a thlen theih avangin duh angin hmalakna a kal chak hleithei lo tih a sawi bawk.

Bangladesh lama insumdawn tawnna chungchang zawhna chhangin, Bangladesh lama insumdawn tawnna, Integrated Check Poiint Post (ICP) Kawrpuichhuah hi sawrkar laipui Ministry of Home hnuaia Land Port Authority of India ten a hmunah rawn kal chilhin hma an lak mek thu a sawi a. Tluang taka kalpui theih a nih chuan rei vak lovah tihhlawhtlin theih beisei a nih thuin Minister hian a chhang a ni.

Kawrpuichhuah (Indo-Bangla) Border Trade chungchanga hmalak mek dan zawhna chhangin Minister chuan, Kawrpuichhuah (Indo-Bangladesh) Border Trade atan hian Integrated Check Post Kawrpuichhuah chu sawrkar laipui in a pawm tawh thu a sawi a, a dinna turin ram bigha 65 ruahman a nih thu leh Land Lease hi Ministry of Home Affairs Secretary hminga dah a nih thu a sawi a. Tun dinhmunah a enkawltu tur, Land Port Authority of India te hian ICP tan DPR siam turin an inbuatsaih mek thu leh a sak hna hi DPR peih a nih atanga kum 2 leh tlemah zawh hman beisei a nih thu a sawi bawk.

Minister chuan Mizoram hmun hrang hrang 9-ah Border Haat siam tum a nih thu a sawi bawk a ni.
(Samuel Lalruatsanga, Zonet News Reporter)

Comments

Chhiar Hlawhte