Serchhip bial Assembly bye-election a hmalak dan tur MPF ten an sawiho

Mizoram People's Forum (MPF) General Hqrs. hruaitute chuan nimin khan Serchhip Bial rawn tlawhin MPF Serchhip District hruaitute nen inkawmna neiin Serchhip Bial-a Assembly bye-election neih turah inthlanna muanawm leh felfai a awm theihna atana hmalak dan tur an sawiho.

He sawihona Serchhip Kawnpui Kohhran Committee Room No. 2 a neih hi MPF Serchhip District President, Rev. Zohmunmawia chuan kaihruaiin he huna rawn kal MPF General Hqrs. General Secretary, Rev. R. Lalnuntluanga chuan Serchhip Bial-a Assembly bye-election neih tur chu Zoram mipuite ngaihven a ni tih sawiin, tunhnaia MPF Board Executive thukhawm chuan he inthlanna neih turah hian nasa taka tanlak a ngai tih chu an pawmtlang tih a sawi a. Hmalak dan tur hrang hrang an sawiho zingah MPF General Hqrs. hruaitute chu Political Party hrang hrangah lengin MPF leh Political Party ten thawhhona thuthlung an lo siam tawh chu tha taka zawm a nih theih nana hmalak an rel thu sawiin, a hmasa ber atan MNF Party Office-ah an len tawh thu leh karleh Thawhtanni khian Congress Party Office-ah an len leh dawn thu a sawi a. Hei bakah hian thuthar thehdarhtute kawmna neiin an hmalakna puanzar an rel thu te, Serchhip leh Thenzawl-a Local Forum te tuaithar-a hmalak an rel thu leh Local Forum hrang hrang tlawhchhuah an tum thu te a sawi bawk.

MPF General Hqrs. a General Secretary chuan Serchhip Bial bye-election neih tur avangin Serchhip Bial chu Mizoram thlirrawn a ni dawn tih sawiin, thianghlim taka inthlanna kalpui anih theih nana tang tlang turin he huna kalkhawmte leh mipuite chu a sawm a. Inthlanna ah MPF te chuan thuneihna tak tak an neilo tih sawiin, amaherawh chu inthlanna dik leh felfai neih a nih theihna tura sawrkar Dan siam leh Model Code of Conduct te kengkawh tura hmalakna chu tihtur pawimawh a nih thu a sawi bawk.

He hunah hian MPF General Hqrs. leh MPF Serchhip District Forum hruaitute chuan Serchhip Bial bye-election neih tura hmalak dan tur hrang hrang an sawiho a, he huna ruahmanna an siam te chu MPF Serchhip District chuan a hlawhtlinna atan ruahmanna an siam zui dawn a ni.