Dampa Tiger Reserve-a Sakei awmzat hriat loh

Environment Forests & Climate Change Minister, TJ. Lalnuntluanga chuan Dampa Tiger Reserve-a Sakei awmzat hriat mai theih a nih loh thu House a hrilh.

Nimin Assembly Session-ah eptu member VL. Zaithanzama zawhna chhangin Forests Minister chuan, Sakei te hi ramhnuai lal an nih avangin an kal kual reng a, a changin Bangladesh-a kal an ni tih sawi a. Sakei hniak hmuh tur awm mah se, tunah tak chuan engzat chiah hi nge awm tih sawi a har thu a sawi a ni.

Forest Department in Staff Quarters engzat nge a neih tih zawhna chhangin, TJ. Lalnuntluanga chuan Forest Department in Staff Quarters 569 a neih thu leh, Revenue Department hriatpui thlapin ram enkawl hmun 82-ah an neih thu in a chhang a, tuna Forest Department Quarters awmna Land Lease an neih lohna te hi Land Lease nei tura hmalak mek a nih thu a sawi bawk.

Zawhbelhna chhangin TJ. Lalnuntluanga chuan, National Park pahnih - National Tiger Reserve leh Wildlife Sanctuary hmun te hi CSS hnuaia Integrated Development of Wildlife Habitats Scheme hnuaia Fund dil thin a nih thu leh, sawrkar laipuiin Fund a pek phal chin atangin Department in a lo buaipui zui thin tih a sawi a, chumi sum hmuh hmanga enkawl a nih thu House a hrilh bawk. Fire Watcher lakna tur pawh sawrkar laipui-ah dil a nih thu sawiin, kumin hian pawisa a tlem deuh avangin Fire Watcher neihna hmun pawh pawisa awmsa atangin Aizawl hnaivai ah hmuh a nih thu a sawi a. Sum a tlem avangin Khawnglung Wildlife Sanctuary-ah te chuan tun dinhmunah Fire Watcher dah a nih rih loh thu a sawi.

Aizawl North-II bialtu MLA, Dr. Vanlalthlana zawh belhna chhangin, tunhnaia Tuirial Hydel Project compensation chungchanga Gauhati High Court-in notification a thiah chu Court sang zawka appeal leh appeal loh tur chu sawrkarin a ngaihtuah mek thuin Environment Forests & Climate Change Minister hian a chhang a ni.