Latest News

Inthlan hmasa aiin tlin beiseiawm lehzual niin hria

ZPM Leader leh Serchhip bial bye-election a ZPM Candidate tur, Lalduhoma chuan inthlan hmasa aiin tlin a beiseiawm lehzual nia a hriat thu a sawi.

Zoram Peoples Movement (ZPM) Thenzawl Block buatsaiha nimin-a Political Training Vantawng Group YMA Run, Then-zawl Bazar Veng-a neih ah he thu hi sawiin Lalduhoma chuan MLA leh AMC inthlanah ZPM chu pahnihna niin, Congress pathumna an ni tih a sawi a, “Mizoram politics ah Sawrkar lai dawttu zelin an thlak a, Pathumna leh Palina niin Sawrkar lai thlak kan lo tum tawh a, kan hlawhchham a, inthlan lo awm leh turah chuan ZPM-ah mipui ten beiseina sang tak an nei a, tun dinhmunah Zoram mipuiin Sawrkarna siam ve turin min beisei a ni,” a ti a. Serchhip Bial Bye-Election neih tur chu Mizoram politics thui tak nghawng tur anih thu sawiin, “A pawimawh a, Zoram thlir mek a ni,” tiin, ZPM Party mipuite theihtawp chhuah turin a chah bawk.

MP leh MLA atanga ban anih chhan ah Dan a bawhchhia ni a an puhna chungchangah Lalduhoma chuan, MP-ah chuan Dan a bawhchhia tih a pha lo tih sawiin, Mizoram tan Central Minister nih theihna kal sanin ram leh hnam tan MP a nihna a hlan tih a sawi a. MLA a ban anih chhan erawh Dan a bawhchhiat vang lam ni lovin, “Session-a ka awm ve hnawk min tih em avangin min paih a ni,” a ti a. Inthlan dawn a Independent-a an din dan leh kalphung, ZPM Candidate leh ZPM MLA nia ngaih vek an nih dan te sawiin, nimin thleng pawhin Chief Minister ngei pawhin ZPM an nih zia a sawi a sawi tih a sawi a, “Dan hi ka bawhchhe lo reng reng a, min ban chhan hi mimal a Politics a in itsikna vanga tih liau liau a ni tih mipuiin an hria a ni,” a ti bawk.

Comments

Chhiar Hlawhte