Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Hnathawh tur nei ten a thawktu tur duh an thlang thin angah Minister in a ngaih thu a sawi

Rural Development Minister, Lalruatkima chuan MLA thenkhatin MGNREGS hnuaia Material Component-ah MLA thenkhatin hnathawk tur duhsak zawng an nei ni-a sawi chu hnathawh tur nei reng rengin hnathawktu tur duh an thlang thin ang mai ni-a a ngaih thu a sawi.

Nimin Assembly thutkhawm ah CLP Leader, Zodintluanga Ralte chuan, MGNREGS atana pawisa lo kal atanga zaa 60 chu hnathawktute hlawh tur niin, a bak zaa 40 chu an huamchhunga hmasawnna hna thawhna tur, Material Component atan dah a nih laiin, Mizoram Sawrkar chuan Material Component atang hian Village Employment Council-ah zaa 30 chauh a dah a, chuta tang chuan DRDA Project Direoctor hman turin zaa 40 dah a ni a, Block Employment Council hman turin zaa 30 dah niin, Department-a thawh tura zaa 60 dah a ni tih sawiin, hei hi Sawrkar-in a hmingchhiat phah a hlauh thu a sawi a. He sum atanga hnathawh tur zaa 25 chu Minister kutah a lut tih te, an hnathawh atangin zaa 25 an la ti-a sawi a tam hle a, heng Metrial Component zaa 40 lo kal hi a thawktu tur dik tak thingtlanga cheng ten an hman tangkai turin hma ala thei em tih tih a zawt a ni.

Hei hi chhangin RDMinister, Lalruatkima chuan ni 100 inhlawhna-a inkaihhruaina chu Act a ni a, chumi hnuaiah chuan inkaihhruaina tam tak a awm tih sawiin, sum lo kal atanga zaa 60 chu hnathawktute hlawh tur niin, a bak zaa 40 chu Material Component a kal tur a ni, a ti a. Material component a kal zawng zawng hi State Emplyment Guarantee Council kaltlanga kalpui niin, hun kaltawh ah 90-10 anga kalpui a ni a, hetah hian VEC chan a tlem deuh ni-a ngaih vangin VEC chanvo hi zaa 30-ah tihpun a ni a, abak zawng chu District leh Block Employment Council-in a kalpui a, hei hi SEGC in a rel a nih avangin duh ang anga kalpui ngawt theih a ni lo tih sawiin, VEC kutah an hlawh tur zaa 60 a awm tho avangin hetiang ruahmanna hi siam a ni tih a sawi.

Lalruatkima chuan, SEGC kaltlanga hna thawktu tur chu District, Block leh Village Employment Council an nih avangin, hnathawktu an chhawr tur lehzelah Sawrkar tan thurawn inpek nachhan tur a awm lova, duhsak zawng an lo nei a nih pawhin hnathawh tur nei reng rengin hnathawktu tur duh an thlang thin ang mai nia a lan thu a sawi bawk.
(Samuel Lalruatsanga, Zonet News Reporter)

Comments

Chhiar Hlawhte