Ni 2 chhungin hri kai hmuhchhuah an awmlo

Zirtawpni leh Inrinni khan Mizoram-ah COVID-19 hri kai hmuh thar awm lovin mi 5 te chu enkawl dam an ni a, Mizoram-a hri kai enkawllai awm zat a tlahniam chho zel.

Zirtawpni khan Mizoram-ah sample 713 enfiah niin heng te hi ZMC Laboratory-ah Sample 37, District hrang hranga TrueNat Laboratory-ah Sample 15 leh Rapid Antigen Test hmangin Sample 661 te niin heng atang hian COVID-19 hri kai hmuh thar an am lova. Inrinni khan Sample 643 enfiah leh ni bawkin heng atang hian hri kai hmuhchhuah an awmlo bawk a, Inrinni-a Sample enfiah te hi ZMC Laboratory-ah 30, District hrang hranga TrueNat Laboratory-ah Sample 14 leh Rapid Antigen Test hmangin Sample 599 te an ni bawk.

Hetihlai hian Mizoram-ah COVID-19 hri kai enkawl dam chu an pung chho ve hret hret thung a, Inrinni khan hri kai mi 4 te chu hri lakah fihlimin anmahni enkawlna hmun atanga chhuahtir an ni a, nimin khan mi pakhat enkawl dam leh an ni bawk a ni. Heti hian nimin tlai dar 5:00 thleng khan Mizoram-a COVD-19 hri kai hmuhchhuah chu 4428 la ni mekin hri kai zinga 4410 te chu enkawl dam an ni tawh a, hri kai hmuh te atanga za zela 99.59 te chu enkawl dam ni tawhin tunah hian hri kai enkawllai 8 an la awm mek bawk a. Hri kai zingah nunna chan mi 10 an awm tawh bawk a ni.

Tun dinhmun ah Mizoram-a District 11 zingah District 7-ah hri kai enkawl awm lovin District 4-ah hri kai enkawllai an la awm a, Aizawl District chu hri kai enkawllai tamna ber la niin tunah hian mi 4 enkawl lai an la awm a, Champhai District-ah mi 2 enkawl an la nih bakah Saitual District leh Mamit District-ah mi pakhat ve ve enkawl an ni bawk.