Bye-election atan MCMC thutkhawm neih a ni

Serchhip bial Assembly bye-election neih tura Media Certification and Monitoring Committee (MCMC) chu nimin khan thukhawmin inthlanpui-a senso hrang hrang chhut dan turte an thlirho.

He thutkhawm Serchhip DC Office Chamber-a neih hi Bawrhsap leh District Election Officer, Kumar Abhishek chuan kaihruaiin inthlanna felfai leh muanawm tak buatsaih anih theih nan Election Commission duh dan-a engkim kalpui a tul thu sawiin, thawktu hrang hrangte pawhin theihtawp chhuaha kan mawhphurhna te kalpui a tul thu a sawi a. MCMC pawhin mawh-phurhna pawimawh tam tak thawh tur a nei a, chungte chu chiang taka kan hriat a tul a ni, tiin he hunah hian chung mawhphurhna te zirhova thlirho chu tihtur hmasa ber anih thu a sawi bawk.

He Meeting-ah hian MCMC mawhphurhna te leh hmalak tulna te uluk taka thlirho a ni a. Expenditure Rate Chart thar pawh a theih chin chin sawiho nghal niin Electronic Media Advertisement Monitoring kalpui dan turte, Media Centre kalpui dan turte leh mipuite hriattur puanzar kawnga hmalak dan turte pawh sawiho a ni bawk. Nimin-a thutkhawm ah hian Addl. DC Lalmuansanga Ralte bakah Election kaihhnawiha Office pawimawh bakah MCMC Member te an tel a ni.