Tui Bill hmanlai kum 2016 a siam a nih thu sawi

PHE Department changtu Deputy Chief Minister, Tawnluia chuan Mizoram-a Tui Bill hman mek chu kum 2016-a siam a nih thu a sawi.

Nimin a Assembly thutkhawm zawhna leh chhanna huna Tui Bill chungchanga zawh belhna a chhanna ah he thu hi sawiin Deputy Chief Minister chuan tuna Tui Bill hman lai mek chu June ni 24, 2016 khan khatih laia sawrkarin rate a siam ang ang kha hman chhunzawm zel niin rate thar siam lova hman ngar ngar a nih thu a sawi a. “Tui Bill ti sang si, Tui ti tlem bawk si an tih hi chu an hriatsual palh liau liau a nih ka ring. Chutianga sawitu te chuan he rate an lo siam a ni tih pawh lo hre let ve se a that ka ring,” a ti bawk.

Nimin-a thutkhawm ah hian Aizawl khawpui chhunga Tui harsatna thleng mek chungchang sawichhuah niin Deputy Chief Minister chuan tunlaia Aizawl khawpui Tui harsat chhan chu Power lamah harsatna an neih vang niin a sawi a. Luangmual-ah P&E Department in transformer an bun lai, Phase-I leh II Tui pump khawl tihkalna a chhiat vang nia sawiin, hei hi PHE Department pawhin February 23, 2021 khan hriain theihtawp chhuahin a tel lo-a Tui pump dan kawng dapin hna an thawk mawlh mawlh tih a sawi a. “Transformer siam a nih avangin nitin-a Aizawl khawpui Tui pump litre nuai 37 hi pump tlin a theih tak loh avangin nitin Tui hmuh thin zat a tlem lo thei lo a ni,” tiin House kaltlangin mipui hriatthiamna a ngen nghal a ni.

Tawitlang atanga lei hipna hmanga tui lak pawh Aizawl chhimlam tan bik tuna neih phak baka Tui pe turin ruahmanna siam mek a nih thu leh zaa 35 vel hna thawh zawh tawh a ni tih sawi a, COVID-19-in hna thawh tam tak a tih khaihlak avangin hna zawh hun tur a tih khawtlai thu sawiin, “Phase-I leh II bakah Phase-III in Aizawl khawpui tui lak a rawn belhchhah ang a, Tawitlang atangin a rawn belhchhah leh bawk anga, heng hian a pangngaia hna an thawk thei a nih chuan kum 2030 thleng chu Aizawl khawpui chuan Tui harsa lovin a awm ang tiin beiseina nen kan thlir a ni,” a ti bawk.