Health Care-ah SEDP atangin Vbc. 20 dah a ni

Health & Family Welfare Department changtu Minister, Dr. R. Lalthangliana chuan kum 2019-2020 khan SEDP atangin Health Care-ah cheng vbc. 20 dah a nih thu House a hrilh.

Health Care chungchang Assembly Session-ah eptu member pahnih, Vanlalhlana leh C. Lalsawivunga te zawhna intawm chhangin, Health Minister chuan tun Financial Year (2020-2021) chhung hian damlo mi 11,244 in Health Care Scheme hmang tawhin, kum 2020-21 chhungin Health Care Scheme hnuaia inziaklut chhungkua 1,12,427 leh Golden Card hmang thei chhungkua 1,94,859 an awm tih a sawi a ni.

Health Minister chuan kum 2020-21 chhunga Mizoram Health Care hnuaia inziaklut District hrang hrang atangin February ni 24, 2021 thlenga tlingkhawm zat chu Rs. 6,70,74,160 a nih thu a sawi a. January ni 31, 2021 thlenga bill la pekchhuah loh hi mi 6101 an awm thu leh bill zat chu Rs. 15,34,54,260 a nih thu a sawi bawk.

COVID-19 vanga Voluntary Workers rawih chungchang Dampa bialtu MLA, Lalrintluanga Sailo zawhna chhangin Health Minister chuan, sawrkarin COVID-19 avanga Voluntary Workers a rawih te hi Category 12-ah then niin, thla tin lawmman pek dan chu - Doctor (MBBS) Rs. 50,000/-; Doctor (BDS/BHMS) Rs. 40,000/-; Contact Tracing Leader (Pharm. D) Rs. 30,000/-; Staff Nurse leh Pharmacist Rs. 22,000/- ve ve; Staff Nurse (Quarantine Monitoring), X-Ray Technician, Lab Technician leh Health Worker-te Rs. 18,000/- theuh; Contact Tracing Assistant Rs. 16,000/-; Data Operator Rs. 11,000/-, Driver Rs. 9,000 leh Helper Rs. 7,000/- te an nih thu a sawi.

Health Minister chuan Mizoram-a Primary Health Centre 51, Sub-Centre 45 leh Urban Primary Health Centre 8-ah Health and Wellness Centre din a nih tawh thu a sawi bawk.