Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

CADC-ah CEM nilai a bang

Chakma Autonomous District Council (CA-DC)-a Chief Executive Member, Rasik Mohan Chakma chuan nimin khan Mizoram Larsap, PS. Sreedharan Pillai hnenah a banna a thehlut. Thudawn danin CADC-a CEM hian Deputy Chairman kaltlangin Larsap hnenah a banna lehkha hi a thehlut a, January 21, 2019 atanga CEM nihna chelh tan, RM. Chakma hian sawrkar lai MNF MDC-te zingah amah thlawptu pakhat emaw chauh a nei tawh a, hetianga politics boruak inlumlet avang hian MNF party hruaitute chu Chawngte-ah kalin ruahmanna thar siam a nih theih nan banna hi a thehlut a ni. Hetihlai hian CADC-a BJP MDC mi 6 te chuan nimin khan MNF an zawm a, Seat 20 awmna CADC-ah hian MNF chuan MDC 18 an nei ta a ni.


Hri kai leh dam thar awmlo

Pathianni khan Mizoram-ah sample 238 enfiah niin heng atang hian COVID-19 hri kai hmuhchhuah an awm lova, heng Sample enfiah te hi Rapid Antigen Test vek niin ZMC Laboratory leh District hrang hranga TrueNat Laboratory-ah te Sample enfiah a awmlo thung. Nimin khan Mizoram-a hri kai enkawl dam an awm belh lo bawk a, heti hian nimin tlai dar 5:00 thleng khan Mizoram-a hri kai hmuhchhuah chu 4465 niin hri kai zinga 4428 te chu enkawl dam an ni tawh a, hri kai hmuhchhuah atanga za zela 99.17 te chu enkawl dam ni tawhin tunah hian hri kai enkawllai 26an la awm a, hri kai zingah nunna chan mi 11 an awm tawh bawk a ni.


Tuahvau Kutpui hman a ni

Fartuah leh Vaube par vullai pualin a tum-khatna atan ‘Tuahvau Kutpui-2021’ chu nimin khan Lamchhip-ah hman a ni a, he Kutpui hi Mizoram-a tualto pangpar leh ramngaw mawina mipui ten an hlut thar theih nan leh hemi hmanga khualzin hip kawnga hmasawn theihna atana buatsaih a ni. He hunah hian Lamchhip VCP, Rodingliana chuan an khua a Fartuah leh Vaube hlutpuitu an awm chu lawmawm an tih thu sawiin, an khaw dai-a Fartuah leh Vaube te chu an humhalh zel dawn thu leh a par tlantu nungcha te humhalh pui turin helai hmun tlawhtu te chu a chah bawk.


Hnahthial-ah Jio Off sak

Hnahthial Thalai Pawl chuan Hnahthial-a Jio khawl chu nimin khan an Off sak. Hnahthial Thalai Pawl te chuan Hnahthial-a internet signal chhe lutuk chungchangah hma lain, Airtel leh Jio company te hi an ngen tawh thu leh vawi tam tak an ngenna in awmzia a awm loh avangin nimin khan Hnahthial-a Jio khawl hi an off sak tih an sawi a. Jio lam hotute atanga thu lawmawm an dawn hma chu an khawl te hi off sak an nih dawn thu leh tunkar chhunga an hotute atanga thu lawmawm an dawng lo a nih chuan, a tul dan a zirin Hnahthial khua atanga inlachhuak tura tih tum an tum tih an sawi bawk.


Tuipui leh a fintu thianfai

Champhai khawpui fai, mawi leh hrisel siam kawnga hmalakna kalzelah nimin khan Champhai khawpui chhunga Village Council hrang hrangte bultumin, Champhai khawpui tui tlan ber, Tuipui leh a fintu kawrte thenfai hnatlang neih a ni a, he hun hi Champhai DC, Maria CT. Zuali chuan a hmanpui a ni. He hunah hian Plastic/Polythene leh hnawmhnawk hrang hrangte thenfai niin, Tuipui lui hnar heng- Kanan Veng chhung tuiluan kawr, Dinthar Veng kai, New Champhai to Tuipui lei, Zote kai leh Keilungliah luite chu mawhphurtu tura ruat sawrkar Officer leh Veng hrang hrang atanga hnatlang a chhuak tlawmngai ten a theih ang angin an thianfai a ni.


PC Party in Candidate thlah

Peoples' Conference (PC) Party chuan Serchhip bial MLA bye-election lo awm tura an Candidate, Vanlalruata Nomination File tur chu nimin khan Aizawl-ah thlahna hun an hmang a, he hunah hian an President, Lalhma-ngaiha Sailo chuan mimal inbeihna lam aiin Brig. T. Sailo policy hmanga fimkhur taka campaign a tha tih sawiin, Model Code of Conduct leh MPF nena an thuthlung ziah te zah a bawh-chhe lo tura a duh thu leh thu tak leh thu dik chauh hmang tura a duh thu a sawi. Kum 1978 leh 1979 MLA inthlanpuiah PC Party-in Serchhip bial-ah hnehna a lo chang tawh tih sawiin, tun tumah pawh beiseina an neih san thu a sawi bawk.

Comments

Popular News (Last 30 Days)