Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Chanchin thar thenkhat :

Union Minister hnenah thlen

Chief Minister, Zoramthanga tirhin nimin khan Mizoram MP te 2, C. Lalrosanga leh K. Vanlal-vena te bakah State Planning Board Vice Chairman, H. Rammawi leh MNF Adviser Rosangzuala te chuan Union Minister of State for Home, Nityanand Rai chu a pisa-ah hmuin Mizoram-a Myanmar Refugee rawn lutte chungchang leh Aizawl khawpui laili atanga Assam Rifles te Zokhawsang-a an insawn dan tur chungchanga an sawipui a. Union Minister hnenah hian sipai sawrkar tihduhdahna avanga harsatna nasa tak tuar mek Myanmar mipuite tanpui tura tun aia nasa zawka India sawrkar a chet a tul thu thlenin, India ram-a raltlan rawn lut te pawh thawn haw rih lova, a tul dan ang zela lo chhawmdawl turin India sawrkar an beiseiin an ngen a. Democracy namthluk a nih avanga buaina leh Democracy tungding leh tura beihna hi tun aia chak zawka thlawp a tul tih an thlen bawk.


MBSE Office sa tha dawn

Mizoram Board of School Education (MBSE) Office building thar sakna tur lungphum chu nimin khan School Education Minister, Lalchhandama Ralte chuan a phum. MBSE Office building thar tur hi a vaiin chhawng 8 tur a ni a, Building awmsa mila building thar sak tura duan niin Ground Floor hi lirthei dahna atan rua-hman a ni a, tuna building awmsa bul chiaha sak tur niin, tuna building hman mek hi a vaia thuam-that leh siam danglam vek tura ruahmanna siam a ni. He building thar sakna tura sum ruahman zat chu Rs. 8,32,97,207/- niin T. Thanzauva, Electric Veng, Aizawl chu hna thawk tura thlan a ni a, Feb. 18, 2023-ah zo hman tura ruahman a ni.


Lunglei-ah Hnam Run hawng

Chief Minister leh MNF Party President, Zoramthanga chuan nimin khan Lunglei-ah Mizo Hnam Run a hawng a, he hunah hian Zoramthanga chuan MNF chu Hnam thinlunga innghat, ‘Pathian leh kan ram tan’ tih thupuia neitu an nih thu a sawi bawk.


Mipui ngaihdan lakna nei

Kum 2021-2022 atana Power & Electricity Department in Electric man a bithliah chungchang a mipui ngaihdan lakna chu nimin khan Aijal Club-ah Joint Electricity Regulatory Commission (JERC) for Manipur and Mizoram bultumin neih a ni a. He hunah hian kum 2021-2022 chhunga P&E Department inenkawlna tura sum mamawh zat chu cheng vbc. 659.58 a nih thu leh Power chhit man tihsan atanga sum hmuh chhuah beisei zat chu cheng vbc. 485.31 niin Department sum mamawh indaihlohna phuhruk na tura sawrkar atanga hmuh beisei zat chu cheng vbc. 174.27 a ni a. Electric power chhit man hi za zela 41.92% a tihsan turin ruahman a ni. Nimin-a mipui aiawh kalkhawm zingah ZPM Party chauhvin Power tariff tihsan chung-chang ah hian ziakin an ngaihdan an thehlut a ni.


Chief Secretary in hmanpui

Mizoram-a sawrkar hnathawk inzawm-khawmna, Federation of Mizoram Government Employees & Workers (FMGE&W) chuan nimin khan Aizawl Vanapa Hall-ah General Conference vawi 31-na hmangin Chief Secretary, Lalnunmawia Chuaungo chuan a hmanpui a. He hunah hian Chief Secretary chuan Mizo-ram hmasawnna chahbi kawltu chu sawrkar hnathawkte an ni tih sawiin, FMGE&W member te chu mipuite rawngbawltu 'public servant' an ni tih hre reng turin a chah a. Sawrkar inrelbawlna kalphung pawh hun inthlak dang-lam mil zela herrem a tul thin tih sawiin, tun aia awmze nei leh tangkai zawka hnathawh a nih theih nan System Reforms kalpui a tul nia hriat a nih thu a sawi bawk.

Comments

Popular News (Last 30 Days)