Latest News

Governor kawm dan tur sawihona neih a ni

Mizoram Governor, P.S. Sreedharan Pillai-a’n tun thla ni 23-a Serchhip a rawn tlawh huna tlawmngai pawl, Political Party leh Kohhran hrang hrang hruaitute a kawm dan tur nimin khan Bawrhsap hovin sawiho a ni.

He sawihona Ser-chhip DC’s Meeting Hall-a neih ah hi District Bawrhsap, Kumar Abhishek chuan kaihruaiin tun thla ni 23 khian Mizoram Governor, P.S. Sreedharan Pillai chuan Serchhip District rawn tlawh a tum thu sawiin, a hun hman dan tur ruahman lawk te a tarlang a. Mizoram Governor hian chawhma dar 11:00 leh chhun dar 12:00 inkarah tlawmngai pawl hrang hrang, Political Party hrang hrang leh Kohhran hrang hrangte bakah thuthar thehdarhtute a kawm dawn a, hemi hun hman dan tur hi sawiho a tul avanga Meeting hi koh a nih thu a sawi bawk.

Ruahmanna siam lawk dan chuan Mizoram Governor kawmna hun hi hlawm 7-ah then tura ruahman niin heng hlawm hrang hrangte hian minute 10 chhung zel Governor hi an kawm anga, he hunah Governor kawm turte chu Governor hnena rawtna thlen duh an neih te ziaka thlen tura hriattir an ni bawk.

Mizoram Governor hian March 23 khian zing dar 9:15-ah Helicopter hmangin Serchhip hi a rawn thleng anga, hemi hnu hian DC Office-ah sawrkar Department hotute kawmin NGO, Kohhran leh Political Party hruaitute hi a kawm chhunzawm nghal anga. Tourist Lodge-ah Chaw chhun eiin Zoar Deprived Children’s Home leh District Hospital te tlawhin hemi hnu hian Thenzawl a pan nghal ang. Thenzawl-ah hian Governor hi Golf Course Resort-ah zan riakin zan lamah a pual hian hun hman a ni bawk dawn a ni. Mizoram Governor hian nikum khan Serchhip District hi rawn tlawh turin ruahmanna a lo siam tawh a, amaherawh chu hri leng avanga inkharkhip kalpui a nih tak avangin tih hlawhtlin theih a ni ta lo thung a ni.

Comments

Chhiar Hlawhte