Court-a PIL ngaichang mek

Land Revenue and Settlement Minister, Lalruatkima'n Aizawl khawpui chhung Assam Rifles ram-a mimal ram nei cancel tura tih chu Court-in PIL a ngaihtuah hun ngaihchan mek a ni tih House a hrilh.

Nimin a Assembly thutkhawm ah Aizawl South-I bialtu MLA, C. Lalsawivunga zawhna chhangin Revenue Minister hian, Assam Rifles ram cancel tur hian Council of Minister-in a rel a, chumi bawhzui chuan Chief Secretary hovin hmalak dan tur an buaipui tih a sawi a. Chutiang a nih mek lai chuan Central YMA in hemi chungchangah hian Court-ah PIL a thehlut a, PIL hi tunhnaiah ngaihtuah turin a awm mek avangin mimal ram hi cancel tura buaipui mek ni mah se, PIL ngaihtuah hun hi ngaihchan a ngaih avangin cancel theih a la ni rih lo tih a sawi.

Lalruatkima chuan, Court thubuai la chinfel loh LR&S Department hnuaiah 1,863 leh Mara Autonomous District Council hnuaiah 13 a awm thu sawiin, ram inchuh thubuai LR&S Department hnuaiah 1,804 leh Mara Autonomous District Council hnuaiah 3 awm anga ngaih a ni tih a sawi bawk.

Land Acquisition thil leh Private ram luahsak avanga sawrkar Court a chakloh avangin kum 2019-2020 chhungin Mizoram sawrkarin sum sen a neih te sawiin, UD&PA Department in Edenthar Veng-a Hawngtial ram BSUP building sakna ram avangin Land Aquisition Compensation Rs.88,84,184 sen a nih bakah MZU kawngah ram hlutna Court-in tihpun a remtih avangin PWD-in Rs.1,61,95,920 sen a ni tih a sawi a, hemi kum chhung hian Railway Ministry-in Land Calue pek loh chu Court thupek angin Rs. 49,54,59,000 sawrkarin a chawi niin a sawi a. Sawrkar Flagship Programme, SEDP hnuaia Mau chinna leh ranvulhna tur khaw thlan bikte Land Survey chu Lawngtlai District-ah neih tum mek a ni tih a sawi bawk.