Mizoram-ah hri kai pakhat hmuh belh leh a ni

Niminpiah khan Mizoram-ah Sample 516 enfiah niin heng atang hian COVID-19 hri kai mi pakhat hmuh leh a ni.

Niminpiah-a COVID-19 hri kai hmuhchhuah hi Champhai District TrueNat Laboratory-a sample enfiah pathum atanga hmuhchhuah niin tunhnaia hri kai hmuhchhuah tawh nen inkawmhnaihna an neih atanga hri kai hmuhchhuah a ni. Niminpiah khan ZMC Laboratory-ah Sample 10 enfiah niin Rapid Antigen Test hmangin Sample 503 enfiah a ni bawk a, hri kai hmuhchhuah an awmlo a ni.

Nimin khan Mizoram-ah hri kai enkawl dam an awm belh lova, heti hian nimin tlai dar 5:00 thlenga Mizoram-a hri kai hmuhchhuah chu 4435 niin heng zinga 4416 te chu enkawl dam an ni tawh a, hri kai zaa 99.57 te enkawl dam ni tawhin hri kai enkawllai 9 an la awm mek a ni.