India Independence Day vawi 75-na lawm dan tur Prime Minister hovin sawiho a ni

India ram Independence Day vawi 75-na lawm dan tur ngaih-tuahtu, National Committee for 75th Anniversary of India's Independence Commemoration chu nimin khan a vawikhatna atan Prime Minister hovin an thukhawm.

He thutkhawm hi Video Conferencing hmanga neih niin Mizoram Larsap chuan National Committee ruahmanna hnuaiah Independence Day vawi 75-na hlawhtling taka Mizorama lawm a nih theih nan theihtawp chhuah a nih tur thu sawiin, India zalenna sualtu, Mizoram mi leh sa te chu an inpekna leh inhlanna hriatpui nan chawimawina hlan an nih tur thu a sawi bawk.

India Independence Day vawi 75-na hi National Level leh International Level-ah ropui taka lawm tum a ni a, hemi atana ruahmanna leh inkaihhruaina duang turin National Committee for 75th Anniversary of India's Independence Commemoration chu March ni 6, 2021 khan din a ni a. Prime Minister Narendra Modi chu Chairman niin, member 259 an awm a, heng zingah hian President hluite, Chief Justice of India, Lok Sabha Speaker, Sawrkar Laipui-a Minister ho te, Prime Minister hlui te, State hrang hrang Governor leh Chief Minister te, Bharat Ratna awardee te leh sawrkar Official pawimawh tak takte an tel a. Nimin a thutkhawm hi Union Home Minister, Amit Shah chuan a kaihruai a ni.