Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Lokayukta tan Investigating Agency buaipui mek

Chief Minister, Zoramthanga chuan Mizoram Lokayukta-in Investigating Agency hran a neih theih nan hmalak mek a ni tih House a hrilh.

Assembly Budget Session neih meka Aizawl South-I bialtu MLA, C. Lalsawivunga zawhna leh Aizawl North-II bialtu MLA, Dr. Vanlalthlana zawh belhna a chhanna ah Vigilance changtu nibawk, Zoramthanga hian Mizoram Lokayukta-in ama pualin thubuai chhuitu, Investigating Agnecy ala neih loh avangin ACB an hmang rih a, ACB hmang lova an mahni-in a hranpaa Enquiry titu tur an neih chu Sawrkar-in tha a ti a, a tihlawhtlin dan turin ngaihtuah mek a ni, a ti a. Chutihrual chuan hna siam zung zung a harsat avangin an siam theih hma chu ACB-in a hmui rih a, ACB rawih ngai lova a hrana Enquiry titu tur an neih theih nan hmalak mek a ni tih a sawi.

Chief Minister Zoramthanga chuan, Mizoram Lokayukta in thubuai 25 a dawng tawh tih sawiin, chung zinga 14 chu chhui chianna, Preliminary Enquiry ti tura tih a ni tawh a. Lokayukta-in Preliminary Enquiry ti tura a tih ni lo, ACB atanga Preliminary Enquiry report Lokayukta-a thehluh 9 a awm tawh a, thubuai 2 chu chhui zui tlaka ngaih a nih loh avangin tihtawp a ni tih a sawi. Chief Minister sawi danin, Mizoram Lok-ayukta-ah hian thawktu Post 35 a awm mek a, Post siam belh dilna Sawrkar-ah an thlen tawh a, chu chu ngaihtuah mek a ni a. An mamawh Sawrkar-a an thlente chu a tul angin bek belh zel theih a ni a, hetihrual hian an dil ang apiang an tihlawhtling ang tihna ni lovin, Finance Department nen inrawn chungin an mamawh ngei ni-a ngaihte chu pek belh an nih tur thu a sawi bawk.

Comments

Chhiar Hlawhte