ACB in K. Oil rawn chhui

Tunhnaia Serchhip-a Khawnvartui dah tur a rawn thleng kimlo nia sawi chungchang chhuitu Anti Corruption Bureau (ACB) te chuan Serchhip rawn chamchilh mekin Khawnvartui hralh nia sawi chungchanga thu hriat nei nia an hriat te thu an zawtfiah.

Thla kalta February thla-a Serchhip-a Khawnvartui sem tur rawn thleng a kimlo nia an hriat avanga Serchhip District Consumers Association (SDCA) ten thuchhuah an siam hnuah hemi chungchang ah hian Central YMA chuan Feb. 18, 2021 khan Mizoram Chief Secretary hnenah hemi chungchang chhuifiah tura ngenna hi an thehlut tih SDCA hruaitute chuan an sawi a, hetianga Chief Secretary hnena ngenna thehluh a nih hnu hian hemi chungchang chhuifiah tur hian Anti-Corruption Bureau (ACB) te chu hrilhin hemi ang hian niminpiah atang khan ACB atang hian Dy. SP, Zosangliana leh ASI Thangkima te Serchhip-ah rawn kalin he thil kaih-hnawiha hriat nei te chu thu an rawn zawtfiah a ni.

Heng ACB atanga rawn kal te hian niminpiah khan Supply Department hotute kawmin Police te pawh hemi chungchang an chhui tawh chin te an zawtfiah bawk a, nimin khan Serchhip-a Legal Metrology Inspector Office-ah Supply Department hotute leh Legal Metrology Inspector bakah Serchhip District Consumers Association hruaitute kawmin hemi hnu hian Serchhip-a Khawnvartui semna hmun tlawhin Khawnvartui an chhekkhawl dan te an enfiah hnuah Retailer pathum zinga Serchhip-a awm mi pahnih te chu kawmin thu an zawtfiah bawk a ni.

ACB atanga rawn kal te chuan tuna an hmalakna leh Serchhip DCSO in Serchhip Police Station-a FIR a thehluh chu a hrang tih an sawi a ni.

Hetihlai hian Serchhip-a Khawnvartui dah tur hralhtu  Driver hian Khawnvartui a hralh hnawhkhahna tur hi a rawn dah dawn hnai nia hriat a ni a, mipuite hnena semchhuah leh dan tur erawh hriat a ni rihlo thung.