Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

MJA Member te tan sawrkarin Pension Scheme siam ngei a tum - I&PR Minister

Nimin-a Mizoram Legislative Assembly Session chhunzawm-ah I&PR Minister Lalruatkima chuan Mizoram Journalists' Association (MJA) Member te tan sawrkarin hamthatna hrang hrang a siam te sawiin, MJA te tan Pension Scheme siam ngei a tum tih House a hrilh.

Nimin-a Assembly thutkhawm ah Lawngtlai West bialtu MLA, C. Ngunlianchunga zawhna chhangin I&PR Minister, Lalruatkima chuan, kum 2019-2020 chhungin sawrkarin MJA te tana hamthatna hrang hrang a siam tih sawiin, hemi hun chhung hian Press Tour vawi li neih a nih thu te, Lok Sabha-ah Training Program on Parliamentary Process and Procedures for Media Personnel at Bureau of Parliamentary Studies siam a nih thu te, February ni 26, 2020 atanga hman tan turin Advertisement Rate tihsan a nih thute, mi paruk te hnenah Ex-gratia pek an nih thu leh mi 65 te hnenah Medical Assistant pek a nih thu a sawi a ni.

June 2019-a MLA pathum te zawhna chhannaah, Journalist te hamthatna tur Pension Scheme buatsaih mek a nih thu sawi tawh chungchanga zawhbelhna chhangin I&PR Minister chuan, “Kan sawrkar chhungin kan ti a, sawrkar chhung a la reiloh bakah Covid-19 in min tibuai bawk si a, chumi chhungin theihtawp chhuahin tan kan la a ni,” tiin, Law leh Finance Department-te telna Pension Scheme ngaihtuahtu tur Committee te dinin ruahmanna te sawihona neih a nih thu a sawi a. October 2020 khan I&PR buatsaihin MJA te nena sawihoin, he Meeting-ah hian ngaihdan hrang hrangte thlirho leh a nih thu te, sum dinhmun te enin rawtna siam-that ngai laite siamtha leh tura thu an dah thu a sawi bawk.

Journalist pension scheme tih hlawhtlin ngei tuma tan an lak mek thu sawiin Lalruatkima chuan, “Mizoram Journalist te Pension Scheme hi sawrkar chuan siam ngei a tum a, tunah hian Proposal sawrkar-ah a kal mek a. Bawhzui ngai te bawhzuiin Pension pek ngei hi sawrkar chuan a tum a ni,” a ti.

Comments

Chhiar Hlawhte