SP thar in thuthar thehdarhtute a kawm

Serchhip District-ah VDP tihnun tum a ni dawn

Serchhip District Superintendent of Police (SP), Stephen Lalrinawma MPS chuan nimin khan Serchhip-a thuthar thehdarhtute kawmin thawhhona tha tak an neih a beisei thu a sawi a, Serchhip District-ah VDP tihnun thar an tum tur thu a sawi bawk.

Kar hmasa-a Serchhip District SP mawhphurhna latu Stephen Lalrinawma hian nimin khan a Pisa-ah Serchhip-a thuthar thehdarhtute kawmin Police leh thuthar thehdarhtute chu mipuite nen inhnaih te a thawk, khawtlang tana thawk an ni tih sawiin, a bik takin Police te chu sawrkar kut ke pawimawh tak an nih avangin an tanho thiam a tul thu leh thawhhona tha tak an neih a beisei tih a sawi a. Serchhip District-a hna thar a zawm hnuah ruihhlo chungchanga hmalakna chu nasa zawka chhunzawm tul nia a hriat thu sawiin, thla kalta (February, 2021) chhungin ND&PS Act hnuaiah thubuai ziahluh pathum an neih thu leh hei hian tan lak a ngai tih chiang taka a tarlan thu a sawi a, a hma lama hma an lo lak tawhna chu chhunzawm zel a ngai tih a sawi. Hei bakah hian Serchhip khawpui chhung kawngpui chu a tha hle tih sawiin, hemi rual chiah hian fimkhur erawh a tul thu a sawi a, “Kawngpui tha hi fimkhur nan kan hman loh chuan kan thalaite nunna suattu a ni thei a ni,” a ti bawk.

Serchhip SP thar chuan Village Defence Party (VDP) te chu khawtlang-a sualna dona kawnga Police te kut leh ke pawimawh tak an ni tih sawiin, Serchhip District-ah a theih anga tihnun thar an tum tur thu a sawi a. VDP te hi kum thum term an nih thu sawiin, kumtin intuaitharna te pawh an buatsaih a tul dawn thu a sawi a. Serchhip Bial-ah Assembly bye-election neih a nih dawn avanga inbuatsaihna pawh an kalpui mek thu sawiin, boruak muanawm tak hnuaia inthlanna neih a nih theihna atan hmalak a nih dawn thu a sawi bawk.

Hei bakah hian Serchhip-a Traffic Police indaihlohna awm mek chu thuamthat tum a nih thu pawh sawiin, thawktu dah belh tum a nih thu a sawi bawk.

Mizoram sawrkar chuan Serchhip District SP 17-na ni turin Stephen Lalrinawma MPS hi a ruat a, amah hi kum 2004 Batch niin Mizoram Police-ah hna pawimawh hrang hrang a lo chelh tawh thin a, tun thla ni 2 khan Serchhip District SP mawhphurhna hi a la a ni. Nimin-a thuthar thehdarhtute a kawmna hunah hian SP hi Addl. SP PC. Laltanpuia, Serchhip SDPO Kaste Romalsawma leh SP Office-a RO, Inspr. Biak-chhuma ten an tawiawm a ni.