Serchhip-ah World Hearing Day hmangin Beng enkawl uluk a tul zia inzirtirna neih a ni

Ri hriatna lama harsatna thleng thin laka invenna atana inzirtirna atana hman thin, ‘World Hearing Day’ chu nimin khan khawvel pumah hman niin Serchhip-ah pawh he Ni pual hian Beng enkawl that leh fimkhur a pawimawh zia inzirtirna neih a ni.

‘World Hearing Day’ pual hian Serchhip-ah chuan National Programme for the Prevention & Control of Deafness (NPPCD) buatsaihin Serchhip District Hospital OPD Building-ah hun hman niin thupui atan ‘Hearing Care for All’ tih chu hman a ni a, he hun hi District Medical Superintendent mawhphurhna la mektu, Dr. K. Lallawmzuala chuan kaihruaiin Serchhip District Hospital-a Audiometric Assistant, PC. Lalbiakzuali chuan National Programme for the Prevention & Control of Deafness (NPPCD) chungchang leh an hmalakna te a sawifiah a. Mizoram-ah kum 2014 April thla atangin National Health Mission (NHM) hnuaiah NPPCD hmalakna hi kalpui niin Serchhip District-ah pawh kum 2017 atanga kalpui a nih thu leh thawktu mi pahnih an awm mek thu a sawi a. Beng leh ri hriatna lama harsatna nei te tan Beng enna khawl pahnih neiin heng te hmang hian Serchhip District Hospital OPD-ah a duh apiangte rawn theih tura an awm thu a sawi a ni.

He hunah hian NPPCD-a Nodal Officer leh Serchhip District Hospital-a ENT Surgeon, Dr. Joseph Lalmuanpuia Hauzel chuan he Ni puala thupui hmangin kalkhawmte zirtirna a pe a, Beng hmanga ri hriatna pawimawh zia sawiin, amaherawh chu kan Beng hi enkawl uluk ngai leh awlsam taka chhe thut thei a nih avanga enkawl fimkhur a tul thu a sawi a. Beng kherna atana Thir lam chi kan hman thin te chu awlsam taka thil pawi thlen thei a ni tih sawiin, Mit lama harsatna nei ten Tarmit an bun mai thin angin ri hriatna lama harsatna nei te tan pawh Bengdar vuah chu thil zahthlak a nih loh thu a sawi a. Raipuar te tan damdawi ei-ah Beng tana thalo a awm theih avangin raipuar zingah damdawi ei tur chuan Doctor te rawn a pawimawh thu a sawi bawk.

NPPCD Serchhip District-a thawktute chuan Serchhip District leh Mizoram-ah Beng lama harsatna nei an tam thu sawiin, nikum chhung khan Serchhip District-ah mi 200 vel Beng an enfiah atangin a tam zawk chu ri hriatna lama harsatna nei an ni tih an sawi a, Mizoram-a rualban-lohna tam ber pawh ri hriatna lama harsatna neih vang a nih thu an sawi bawk.