Latest News

MPCC in ngaihdam dil turin Law Minister phut

Mizoram Pradesh Congress Committee (MPCC) chuan Law Minister, TJ. Lalnuntluanga chu ngaihdam dil tura an phut thu an sawi.

Nimin-a Aizawl Press Club-a thuthar thehdarhtute an kawmna ah MPCC hruaitute chuan March 15, 2021 (Thawhtanni) khan Mizoram Legislative Assembly Budget Session neih mekah thil thleng ngai lo, thil pawi tak a thleng nia sawiin, Assembly House-ah Lawngtlai West bialtu MLA, C. Ngunlianchunga’n thu a sawi laiin Law Minister, TJ. Lalnuntluanga chuan Member Senior zawk zah derna nei miah lovin, Govt. Chief Whip a nihna hmachhuanin tawngkam mawi lo tak takin a bei tih an sawi a. Hei mai hi duhtawk lovin House pawnlam thlenga umzuiin, tawngkam mawilo tak taka a beih zui bakah kutthlak hial a tum nia sawiin, hetiang thil zahthlak tak Mizoram rorelna sang, Assembly House-a a thleng ta mai chu Congress Party chuan hriatthiam harsa an ti hle tih an sawi.

MPCC hruaitute chuan MNF Party hian June ni 1, 2020 khan Press Release siamin, he an Press Release-ah hian Minister TJ. Lalnuntluanga thusawi “Tun dinhmunah COVID-19 laka kan him theihna chhan hi kan Chief Minister-in Pathian a tih vang niin ka hria” tih chu chiang takin tarlan a ni tih an sawi a. Hetianga a thusawi chiang taka anmahni Party PR ngeia lang leh, chanchinbu a chhuak vek tawh phat a tum leh pawh chu House leh Member zahawm tak takte, an Party Media mite leh chanchinbu mite zahlohna dik tak a ni bawk tih MPCC chuan sawiin, hei vang hian Law Minister chu March 16, 2021 ralhma ngeia Ngunlianchunga hnena ngaihdam dil tura an phut thu an sawi a ni.

Comments

Chhiar Hlawhte