Latest News

Chanchin thar thenkhat :

Epidemiological Centre hawng

AH&Vety Minister, Dr. K. Beichhua chuan nimin khan AH & Veterinary Complex, Khatla-ah Epidemiological Centre a hawng. Epidemiological Centre hi March ni 11, 2016 khan bultan a ni a, Rural Infrastructure Department Fund- XXI hnuaia hna hi thawh niin RIDF atangin cheng nuai 304.95 leh State atangin cheng nuai 16.05, a vaiin cheng nuai 321 senga sak a nih bakah Laboratory bungrua hrang hrang pawh lei nghal a ni bawk. Building hi chhawng thum a ni a, Seminar Hall, Garage leh Postmortem Room bakah Sterilization-cum-Sample Processing Room, ELISA Laboratory, Molecular Unit, ELISA Reader Room te a awm a ni. 


Mipuite himna tur sawiho

COVID-19 Medical Operational Team leh Mizoram Kohhran Hruaitute chuan nimin khan Synod Office-a Committee Room No. 1-ah Good Friday laia Sacramen theh chungchanga in-rawnkhawmna an nei a, he hunah hian khawvel leh India ram hmun hrang hranga COVID-19 hripui lo pung thar mek chungchang te pawh thlirho a ni bawk. COVID-19 thawhhnihna hlauhawm tak thleng mek laka kan him theih nan Kohhran mipui te fimkhur thei ang ber leh him thei ang ber tura sacrament buatsaih theuh an duh thu sawi niin he Meeting hian Good Friday vuakvet lai hian hripui laka Kohhran mipuite an him zawk nan thingpui in ho leh ruai theh loh hram ni se an duh thu an sawi bawk.


IR Sipai te hriselna endik

Zophai Border Outpost-a duty IR Sipai te chu nimin khan an Duty-na hmunah an hriselna endik sak an ni a, he hunah hian 1st IR Battalion-a Commandant, MS.Dawngkima chuan ramri hnaih a Police duty-te chu an hna tha taka an thawh theih nan hriselna tha an neih a pawimawh thu a sawi bawk. Zophai-a Police duty-te hriselna endikna hunah hian duty-te zingah COVID-19 vei rinhlelhawm an awm lova, taksa lama harsatna lian tham nei an awm lo bawk a ni.


Land Customs Station chungchang sawiho

Nimin khan Chief Minister, Zoramthanga chuan Zokhawthar-a Land Customs Station tihchangtlun chungchanga hmalakna ah bialtu MLA leh Minister, TJ. Lalnuntluanga leh Home Department leh Commerce & Industries Department Officer te a kawm a. Ram leh ram insum-dawntawnna mai bakah ram pahnih inlaichintawnna atana pawimawh tak Land Customs Station chu tihchangtlunna tura sawrkar laipui atanga sum sanction hmanga hmalakna tur awm hrang hrangte he hunah hian sawiho a ni a. Sawrkar laipui-a bawhzui ngai awmte pawh bawhzui thuai nise tih a ni.

Comments

Chhiar Hlawhte