Land Leasing Act buaipui mek

Agriculture Minister, C. Lalrinsanga'n buh leh bal thar ti tam turin ram neih dan kalphung, Land Leasing Act buaipui mek a ni House a hrilh.

Nimin a Assembly thutkhawm-a Aizawl South-II bialtu MLA, Lalchhuanthanga zawhna kal zela Aizawl South-I bialtu MLA, C. Lalsawivunga zawhna chhangin, Agriculture Minister hian, tunah hian Land Leasing Act ruahmanna, Draft Bill chu peih a ni tawh tih sawiin, Law Derpartment-ah enfiah tura thawn a ni a, tun Budget Session neih mekah pharh hman tum ni mah se, tum anga Law lamah a kal chak theih tak loh avangin pharh hman a ni ta lova, Law Department lamin an peih hnuah House-a ngaihtuah tura puhluh theih beisei a ni tih a sawi.

C. Lalrinsanga chuan, Sawrkar-in buh leh bal-a intodelh a ngaipawimawh hle tih sawiin, hma pawh an la nasa hle tih a sawi a. Kuthna-thawktute thlai thar ti tam turin awlsam leh hlawh zawka hna an thawh theih nan khawl hmang tangkai turin, Mechanisation Privatisation Large Scale Production kalpui a ni a, chumi dungzui chuan theihtawpin hmala an la a, thar chhuah pawh a pung hle tura beisei a ni a, kumin hian thlai thenkhat kum khata vawi 2 thar thei chi chin a awm nual avangin engzat nge thar tih erawh hriat theih a la ni lo tih a sawi.

Agriculture Minister chuan, buh bal lei turin pawl emaw, Forum emaw din ala awm lo tih a sawi a, Agriculture Board-in a tul anga ngaihtuah erawh a tum tih sawiin, thlai thar lei chungchangah chuan Covid hri len hnua COVID-19 Vegetable Supply Chain-in theihtawp-a hma an lak ang zulzui khan Society Movement-a Market Chain buapui turin hmalak tan mek a ni tih a sawi a. Kut hnathawktute tana subsidy-a pek thin tui lakna polythene pipe chu tun aia kut hnathawktu te’n an indaih zawk nan kawng hrang hrangin hma lak mek a nih thu a sawi bawk.

(Samuel Lalruatsanga, Zonet)