Mizoram Governor in Mamit District a tlawh

Mizoram Governor, PS. Sreedharan Pillai chuan nimin khan Mamit tlawhin DC Conference Hall-ah Sawrkar Officials, Kohhran hruaitu, Khawtlang hruaitu,Tlawmngai pawl hrang hrang aiawhte nen inkawmna an nei.

Mizoram Governor hian Helicopter hmanga Mamit hi tlawhin amah lo lawmna hunah nikum March thla-a Mamit khawpui tlawh a tum tawh chu hripui leng avanga a tlawh theiloh hnu kum khat leh chanve hnu-ah Mamit khawpui tlawh theia a awm chu lawmawm a tih thu leh Mamit District chu Aspirational District an nihna anga hmasawnna chungchang sawiho theia a awm chu a lawmawm hle tih a sawi a ni. Mizoram Governor chuan Mizoram-a kum khat leh a chanve a awm chhunga Mizo mipuite thinlung thatna chu fakawm a tih thu sawiin, khawtlang nuna inpawhtlanna leh thawhhona chuan Mizoram a tihnawm thu a sawi a, a ram mipuite'n rim taka kan thawh a, hma kan lak chuan tun aia hlawhtlinna kan hma-ah a awm thu a sawi bawk.

Governor chuan Mamit District chu Mizoram-a Aspirational District awmchhun a nih anga hmasawnna tam tak hmuh chhoh mek zel niin, mipuite hriselna, zirna leh thildang tam takah hmalakna kalpui a ni tih sawiin, heng hmasawnna te hi mipuite hnen thleng a, a nihna tur ang taka hnathawh a nih zel theih nan District thuneitute leh khawtlang hruaitute chu uluk taka vil turin a chah a. Mamit District chu thenawm State ramri hnaiha awm a nih bakah Bangladesh nena inri a awm a nih avangin ram leh ram inkara thawhhona tha, inpumkhatna leh inpawhtlang taka kan awm theih nan District Officials, ramri hnaih a khaw awmte leh a bik takin ramri-a duty BSF- te chu boruak tha siam zel tura hmala turin a chah bawk.

He hunah hian Mamit District Bawrhsap, Dr. Lalrozama chuan Aspirational District an nihna anga NITI Aayog atanga hmasawnna an hmuh hrang hrangte bakah Mamit District dinhmun tarlangin, Mamit District-ah hian 2011 Census-a lan danin mipui 86, 364 an awm mek a, Village Councils 90 awmin Village 78 leh Sub-Village 10 an awm a, chhungkua 17,731 awmin a mi cheng atanga chhutin za zela 84.74 chuan ziak leh chhiar an thiam a ni. Aspirational District Programme hnuaia Mamit District-in kum 2019-2020 chhunga sum a dawn chu vbc. 9 a nih tawh tarlan a ni bawk.

Mizoram Governor hian Kohhran hruaitu, Tlawmngai pawl leh Political Party aiawhte kawmin Mamit District-in harsatna an neih te a sawipui a. Kohhran hruaitu, Tlawmngai pawl leh Political Party aiawhte hian harsatna an neihte ziakin Mizoram Governor hnenah hian an thlen bawk a ni.