Latest News

MNF Party in Serchhip bial-a bye-election neih tur atan Campaign hawnna an nei

MNF Party chuan Serchhip bial-a Assembly bye-election neih tur atana Campaign hawnna nimin khan Serchhip-ah neiin an Party President leh Chief Minister, Zoramthanga chuan, Serchhip bial-a bye-election neih tur chu Ni chhuah hnu chauh ni lo, Ni tlangsan vah hnu-a neih tur a nih thu a sawi.

Serchhip Bazar-a MNF Party in bye-election atana Campaign hawnna hun an buatsaih ah hian MNF Party President leh Chief Minister, Zoramthanga chuan MLA atangin mimal in ngei leh in huat avanga in ban theih a ni lo tih sawiin, “Mimal-a kan ngei vang, mimal-a kan huat vang hian mi ban tir dawn ila Congress hi ban tir vek kan duh a ni. ZPM MLA zawng zawng ban tir vek kan duh, BJP MLA pawh ban tir kan duh, mahse a theihloh,” a ti a. Serchhip bialtu MLA, Lalduhoma chu India Constitution bawhchhiat avanga Speaker in Dan bawhchhe chungah ro a rel a, chuvangin an ban a ni, a ti a. “Mahni Dan siam bawhchhiaa bye-election neih ngai nih chu a fello, kan tunlai thangthar te hunah hian a tih chi tawhlo a ni,” a ti.

MNF Party President chuan Serchhip bial-ah Assembly bye-election neih a ngai dawn ta tih sawiin, a hmaa Lalduhoma’n hnehna an channa, Aizawl West-I bial-ah pawh bye-election ah chuan boruak dangin, a hmaa ZPM an chakna em em ah MNF Party chuan chiang taka hnehna an chan thu a sawi a, hei hi a bial chhung mite a chhan zuk zawt se, ‘Khua a var tawh a, Ni a chhuak tawh a, MNF a sawrkar tih a chiang si a, sawrkar lo tura luh leh duh khawpa mawl kan ni lo,’ an ti ang, a ti a. Khawvar tawh hnu mai ni lo, Ni a tlangsan hnu-a inthlang tur kan ni tih sawiin, an Candidate hi thlantlin a nih loh chuan Aizawl West-I bial vel chu an nuih a za ngawt ang tih a sawi bawk.

Serchhip Bial chu Chief Minister bial ni thang a nih thu pawh sawiin MNF President chuan, Development kal tur zawng zawngah sawrkar hnena thlentu tur, sawrkar aiawh a mamawh tih sawiin, chumi tur atan chuan Candidate an dah chu khawngaih taka lo vote tling turin a sawm a. “Tun dinhmunah MNF President leh Sr. Vice President-ten Party Hqrs. kan enkawl hman rihlo. Ani hi a taka MNF Hqrs. enkawltu, hotupa ber a ni,” a ti bawk.

He hunah hian Serchhip Bial bye-election a MNF Party Candidate tur, Vanlalzawma pawhin Serchhip Bial-a bye-election enkawl-a Candidate ni turin an Party hotu ten an ruat tih sawiin, kum 1999 leh 2004 MP inthlan ah Ser-chhip Bial mipuite khawngaih Vote dil-a a lo kal tawh thu leh an duhsakna a lo dawn tawh thu a sawi a, tun tumah pawh mipuite Vote hlu tak pe leh tura a rawn dil leh thu sawiin, an Vote hlu tak an pe leh a nih chuan tangkai leh awmze nei taka thawk thei turin an siam dawn tihna a nih thu a sawi bawk.

Vanlalzawma chuan Serchhip Bial-ah a hun lova inthlan a ngai ta tih sawiin, Serchhip Bial tan erawh chuan he hun remchang lo inherchhuak hi a lawmawm hle nia a hriat thu sawiin. Kan ramah Chief Minister Zoramthanga kaihhruai MNF sawrkar piangin hma a la mek reng tih a sawi a, “Chutah chuan Ruling lam thlawp thei tur, House-a sawrkar thil tih sawisel ringawt tur ni lo, he Bial chhung atana hmasawnna tur theihtawpa chhuah turin min han thlang tling ve teh u tiin ka rawn sawm duh che u a ni,” a ti a. Chumi kan ti a nih chuan an hotute nen tangkawpin he khawpui mai bakah a bial chhunga khua te thlengin sawrkar zem zenin ram tan leh mipui tan hma an lak ho tur thu a sawi bawk a ni.

MNF Party in bye-election Campaign hawnna an neih hi Serchhip East Block MNF President, C. Vanlalsiamthara chuan kaihruaiin he hunah hian an Party zawm thar mi 252 te chu an Party President, Zoramthanga hian MNF Party-ah a lawmlut bawk a ni.

Comments

Chhiar Hlawhte