Mizoram-a Khawnvartui sem dan kalphung zirchianga hma la turin sawrkar an phut

Serchhip Sub-Hqrs. YMA leh Serchhip District Consumers’ Association te chuan Mizoram puma Khawnvartui sem anih dan kalphung chu sawrkar in zirchiangin mipui ten kan chanvo dik tak kan chan theih nan hma la se an duh hle tih an sawi.

Hemi chungchanga niminpiah-a thuchhuah intawm an siamah Serchhip Sub-Hqrs. YMA leh Serchhip District Consumers Association te chuan Feb. 16, 2021-a Serchhip-a Khawnvartui dah tur phurtu Motor Driver in mipui chanai tur Khawnvartui barel 10 a lo hralhruk chungchangah a hralhtu driver leh a hriatpuitu nia driver in a sawi, DCSO Serchhip te chuan thil an tisual ve ve nia an ngaih thu sawiin, he thil thleng chungchang ah hian thil awmdan chhui chianga a mawhphurtute chunga action la turin sawrkar an la phut zel tih an sawi a. Tunhnaia Serchhip-a Khawnvartui lo thleng chungchang an chhui zelna ah Serchhip-a Retailer ten an Khawnvartui dawn tur zat mumal pawh an hre lo thin tih hriat a nih thu leh, DCSO leh Driver ten tawngka-a chawpchilh taka an dawn zat tur an hrilh ang ang chu an dawn mai thu Retailer ten an sawi chu hei hi thil diklo tak nia an hriat thu an sawi a. Khawnvartui man zawng zawng hi Retailer ten a pawisafai-in Driver hnenah an thawn thin a, receipt engmah dawn an nei lo a, Driver chuan motor neitu hnenah a submit leh mai thin nia an hriat thu sawiin, “Hetianga sum tam tham tak hi inhlan dan mumal lo taka a kal kual thin hi a tha kan ti lova. Khawvartui retailer tena an dawn zat tur hi lehkha a mumal taka ziaka Retailer te hnena pek lawk kan phut bakah pawisa inhlan chhawn dan pawh hi siamtha turin sawrkar kan phut bawk a ni,” an ti.

Hei bakah hian pawl pahnih te thuchhuah chuan Feb. 16, 2021-a Serchhip Khawnvartui lo thleng tur barel 10 hralh ruk anih thu hriat a ni leh DCSO pawh hriattir nghal a ni chunga a tuk, Feb. 17, 2021-a Serchhip-a Khawnvartui lo thleng a kim biai a dawng ang tho a supply Department lamin Retailer-a Challan an la issue chu mipui te zahlohna leh thil dikloh hupbeh tumna nia an hriat thu sawiin, hemi chungchangah hian a mawhphurtu zawngchhuaka action la turin sawrkar an ngen tih an sawi a. Tunhnaia Khawnvartui hralhruk man chhuah anih atang hian Khawnvartui sem chungchangah hun rei tak atangin thil diklo a lo inphumru tawh tih a lang nia sawiin, “He thil hi Supply Department a thawkte pawhin an hriatpui ngei niin a lang a, chuvang chuan tun hnuah chuan Serchhip mai lovin Mizoram-a Khawnvartui lo thleng reng reng hi an bulhnaia MCU Branch/Sub-Hqrs. YMA/Branch YMA leh Legal Metrology te nene endik loh chuan unload phal tawhin lo turin thuneitute kan ngen bawk a ni,” an ti a. Mizorama Oil a chhiat thin em em nachhan hi mipui chanai tur Khawnvartui hralhruk hmanga pawlhdal anih thin vang nia an hriat thu pawh sawiin, hei vang hian kan sawrkar hian tuna Mizoram puma Khawnvartui sem anih dan kalphung hi zirchiangin mipui ten an chanvo dik tak an chan theih nan hma la se an duh hle tih an tarlang bawk a ni.