Chanchin thar thenkhat :

MZU Convocation hmang

Mizoram University (MZU) Convocation vawi 14-na leh 15-na chu Inrinni khan MZU Campus-a Amphitheatre-ah neih niin University Chief Rector leh Mizoram Governor,  PS. Shreedharan Pillai chuan a hmanpui a, MZU Convocation vawi 14-na hi hri leng avanga nikum-a hman theih a nih loh avangin kumin hian a ruala hman niin he hunah hian Gold Medalists, Ph.D dawngtute leh Book prize winner te chauh tel tir an ni bawk. He hunah hian Larsap chuan Mizoram University in hun reilote chhunga North East mai nilo, India ram chhunga University thang chak ber pawl a ni thei chu Vice Chancellor kaihhruaina tha tak hnuaia thawktu te leh zirlaite thawhrah liau liau a ni tiin MZU hmasawnna atana theihtawp chhuahtu te chungah lawmthu a sawi bawk.

Mizoram University hi kum 2000-a din niin kumin a Convocation-ah hian zirlai hlawhtling mi 9740 hnenah Degree pek thar an ni a, heng zinga mi 167 te chu a hmuna Degree dawng turin an tel thei a ni.

Deputy CM in hmanpui

Central YMA buatsaihin Zirtawpni zan khan Aizawl-a Vanapa Hall-ah YMA Kumpuan 'Zirna Uar' infuihtharna hun hman niin Deputy Chief Minister, Tawnluia chuan a hmanpui a, he hunah hian Deputy Chief Minister chuan YMA Kum-puan hman mek  hlawhtlinna atana hrileng karah pawh YMA Branch hrang hrang ten tha thlah lo a hma an lakna te leh Branch tam tak in zirlai harsa ten zirna an chhunzawm ve theihna atan zirlai harsate chhawmdawl hna nasa taka an thawk chu ropui a tih thu a sawi. Deputy Chief Minister chuan zirtirtu indaihlo lutuk phuhruk nan kum hnih chhungin Zirtirtu 1600 zet lak an nih thu te, Hindi Teacher pawh 540 lak an nih thu te tar-langin, Sawrkarin National Education Policy chu a zirchiang tura a din Study Group leh Expert Committee ten an zirchian mek thu leh, kan hnam leh sakhua mil a NEP-ah kan sengluh leh kan hman (adopt) theih dan tur an zir mek thu a sawi bawk.

Mipuite vaccine pe tan dawn

Tunkar chho atang hian mipui nawlpui hnenah COVID-19 vaccine pek tum a ni a, State Immunization Officer Dr. Lalzawmi chuan Vaccine hi kum 60 chin chunglam leh kum 45 atanga 59 inkar, natna benvawn neite hnenah pek phawt an tum tih sawiin, Vawiin hian a hawnna hi neih tum a nih thu leh hemi hnu hian sawrkar leh private dam-dawi In-ah te pek tan a ni dawn tih a sawi bawk.

Vawiin ah budget pharh dawn

Mizoram Legislative Assembly thutkhawm neih mek chu Inrinni leh Pathianni te chawlh a nih hnuah Vawiin hian chhunzawm leh a ni dawn a, Vawiin hian thutkhawm tan a nih veleh Finance Department changtu Chief Minister, Zoram-thanga chuan kum 2021-2022 Mizoram Budget a phar anga, hemi hnu hian Vawiin atan thut-khawm tihtawp zui nghal a ni ang.