Latest News

Mizoram-ah politics tha hmanga ram rorelna tha tundin tuma beitute kan ni - ZPM Vice President

ZPM Vice President, K. Sapdanga chuan, “ZPM hi Mizoram-ah politics tha hmanga ram rorelna tha tundin tuma beitute awmkhawm kan ni,” a ti.

Inrinni kalta-a Tlungvel Venghlun Branch YMA Hall-a an Party zawm thar lawmluhna hun an buatsaih a hmanpuina ah he thu hi sawiin ZPM Vice President chuan Sawrkar tha siam tur chuan vote zawn dan atanga duhtui a ngai tih sawiin, “Vote dil thahnemngaih vanglai pawhin, Setana lawm zawnga vote zawn loh hram kan tum thin. Chu thuthlung leh tih duh dan kalphung zawm tura rawn penchhuak a, ZPM Party rawn zawmtute hi in fakawm takzet a ni,” a ti a. Ram rorel thei tura an thawh dan kalphungah, Pathian duhdan nia an rin avangin tawngtaia bultan a, tawngtaia hnukhar an duh thin tih sawiin, “Kan la inchhir lo. ZPM Campaigner te chuan chu kalphung chu zawm theuh turin kan inngen a ni,” a ti.

ZPM Vice President chuan Neutral ten an khawngaih sawt hle-a a hriat thu leh nitin-in sawrkar tha tundin duhtu an pung mawlh mawlh nia sawiin, “Mizoram politics kalsual dan-a pawi pawl tak chu, inthlan boruak kan kalpui thiam lo hi a ni. Inthlan hi party inelna a ni a, chu inelna ah chuan Candidate te hi Symbol mai an ni. Candidate-te inelna emaw ti a, kawng tinrenga Candidate-te mawh laktir vek a, senso zawng zawng candidate tum tura ngaih hi, ngaihdan dik lo tak a ni,” a ti a. “Mahni pawl candidate rawk ngat ngat a, rawk dak kan pawisak loh chuan, tlintir kan tum lo tihna a kawk zawk. Chu chu kan sim loh chuan, inthlan a lo awm dawn hunah, candidate atan mi tha zawng lovin mi hausa kan zawng ang,” a ti bawk.

Party hlunho chuan an mi leh sa te tihphur nan, ‘Fatu hlui (Party worker-te) chu a buk bik ve bawk ang chu’ an ti thin nia sawiin ZPM Vice President chuan, “ZPM hi mipuiten sawrkar siam tura an lo hlangkai a nih chuan, Fatu hlui hran a awm lo ang. Mipui hlui a buk ber ang a, mipuiin an kil hmasa ber bawk ang. Fatu ten an kil hnuhnung ang a, ruai-in a daihloh tak pawhin fatute chuan an nghak mai ang. Chutiang huam tur chuan Vawiin-a rawn zawm tharte hian kan rilru kan buatsaih kan beisei a ni,” a ti a. ZPM kalphungah chuan, Hmasawnna chu a kil atangin thawh a ni ang tih pawh sawiin, “Corruption erawh chu a laili atangin kan do ang. Chutiang tur chuan mi thar te leh party mipuite ka ngen nawn leh e,” a ti bawk.

Comments

Chhiar Hlawhte