Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Saitual-ah YMA Sub-Hqrs. Office hawng

Rural Development Minister, Lalruatkima chuan nimin khan Saitual-ah Sub-Hqrs. YMA Office sak thar chu a hawng.

Saitual Bazar Veng-a YMA Sub-Hqrs. Office hawnna hunah hian RD Minister chuan YMA a thawkho thinte chu mahni hamthatna zawng lo leh mahni inhaivur zawnga hma la ngai lo, tlawmngaihna nen midangte tana inphal taka thawk tlang thin an nih avangin an inngaina bik thin a ni, a ti a. “YMA a rinawm leh dik taka kan thawh ang hian kan awmna hmun leh kan hnathawnna apiangah rinawmna leh dikna kan ken tlang zel a pawimawh a ni,” a ti bawk.

COVID-19 hripui leng kara lungthu pathum - Sawrkar, Kohhran leh YMA te thawhhona a ropuizia chu khawvel hriatpui tlak a ni tih pawh sawiin RD Minister chuan, Mizoram in harsatna kan tawh laia Zoram pawn hmun hrang hranga Zohnahthlak unauten “Eitur kan tharchhuah chhung chu riltamin in awm lovang” an rawn ti te chu ropui a tih thu leh zonun zemawi, kan induhsakna leh kan inhmangaihna a par chhuak leh tih sawiin, chhawmnun zel a pawimawh thu a sawi bawk.

YMA Sub-Hqrs. Saitual hi Jan. 22, 2021 khan din niin, an hnuaiah hian Group 5 - Tuiphal, Tuivai, Tuivawl, Tamdil leh Mawmrang a awm a, YMA Branch 41 awmin, YMA member 22,275 (Mipa-12,972, Hmeichhia-9045, Life Member-258) an awm a ni.

Comments

Chhiar Hlawhte