MSU in a tul anga hmalak zel an tum thu an sawi

Mizo Students’ Union (MSU) chuan Mizo-ram Rural Bank (MRB) hnuaia Office Assistant atana chhawr lai hnamdang mi paruk (6) te an hun pel veka hnathawk lai te chu tun thla chhunga ban an nih loh chuan a tul anga hma lak zel an tum thu an sawi.

Nimin khan Aizawl Press Club-ah thuthar thehdarhtute kawmin, MSU President, J. Lalmuanzuala chuan MRB-in an Branch hrang hranga mi paruk an chhawr mekte hian RRB (Officers and Employees) Service Regulation, 2010 leh Appointment Rules, 2017 ang hun an bawhpelh mai bakah, Mizo tawng pawl riat chin emaw, a tlukpui emaw tal thiamna (Local Language Proficiency) test buatsaih an la paltlang loh avangin, an Service hi terminate tur anih piah lamah an service disqualify tur a nih thu a sawi a. Heng hnathawk mekte chu Chandan Choudhury, Kawlkulh Branch; Shailesh Kumar Singh, Champhai Branch; Rishabh Raj, Mar-para Branch; Amibatha Nath, Kanhmun Branch; Amit Kumar, Ngopa Branch leh Sumit Kumar, Sangau Branch-te an ni tih a sawi bawk.

MSU President hian Serchhip MRB Branch-a chhawr mek Assistant Manager, Punit Kumar Jha hova inthurualin, August ni 10, 2020 khan Chief General Manager, SBI Corporate Centre, Mumbai-ah Mizoram Rural Bank Management chu dawta an hek chu an hriatthiam loh thu pawh sawiin, an heknaah chuan Local Language Proficiency Test chu an hna atanga chawlhtir theihna hmanrua atan an thawhpuite'n an hman thu leh MRB inrelbawlna chu rintlak anih loh thua an hek thu a sawi a. Hemi chungchang ah hian MRB Chairman, V. Jaya Chandra leh General Manager te pawh tum hnih an hmuh tawh thu leh tun thlenga hmalakna an la neih loh thu a sawi a. An ngenna in awmzia ala neih loh fo chuan a tul ang zelin hma an lak tur thu a sawi bawk.