Latest News

Congress Party in bye-election atana hmalak zel dan tur sawihona an nei

Serchhip Block Congress Committee chuan nimin khan Extended Committee thutkhawm an nei a, he hunah hian Serchhip bial-a bye-election neih tur atana hmalak dan tur sawiho in he hun hi bye-election neih tura an Candidate, PC. Laltlansanga chuan a telpui a ni.

Serchhip Hmar Veng YMA Hall-a he thutkhawm hi Serchhip Block Congress Committee President, R. Vanlaldula chuan kaihruaiin he hun hmanpuitu PC. Laltlansanga chuan Mat phai leh Zau hrang hranga Thlasik thlai, sum chang thei ching tute an mangang hle tih a sawi a. Nikum 2020 khan Covid avangin phai atangin chawhmeh a lo lut tam thei lova, Serchhip khuaa kut hnathawktu ten an thlai thar tha takin an hralh tlangpui a. Tunah chuan Bawkbawn kg. khat Rs. 3/- te in kharchhawng ten an laksak a. Zikhlum pawh a tlawm hle tih a sawi a. “Thlai thar hralh tura sengkhawm dawnin hlawhfa lak te a ngai a. Hlawhfa man daih loh mai te a hlauhawm rum rum mai a ni,” a ti.

PC. Laltlansanga chuan Serchhip bial leh Zoram hmun hrang hranga kut hnathawktute dinhmun siamthat nan leh an thlai tharte man zawka an hralh theih nan phai atanga thlai lo lut, Thlasik thlai chu hun engemaw chen Vairengte Gate-ah lakluh phalloh emaw, Phai atanga thlai lo lut te Chhiah sang tak lak chu Mizoram chhunga tharchhuah te hralhna a that phah ngei ang tih a sawi a. “Chuvangin kut hnathawktute harsatna sutkian dan tur hi sawrkar hian a ranglamin ngaihtuah vat se a lawmawm hle ang,” a ti bawk.

He hun hi Aizawl District Congress Committee-a Vice President, PC. Lalhuapzauva pawhin hmanpuiin Serchhip bial bye-election candidate atan MPCC hotu ten PC. Laltlansanga an ruat chu a lawmawm hle tih a sawi a. Serchhip pa, bial chhungmi ngei a ni tih sawiin, “Zoram khawpui dangte angin mahni bial chhung mi ngei MLA neihna hun Serchhip bial mipuite tan a inhawng a ni,” a ti a. Congress Party chu rorelna fawng vuan turin a ding chhuak leh mek nia sawiin, “Chumi hnuaiah chuan MPCC Hqrs. hian kan fighter tha ber te zinga mi candidate turin kan rawn dah a. Pathian leh mipui zarah a tlin ngei pawh kan ring a ni,” a ti bawk.

He hunah hian Village hrang hranga Campaign Committee ten an hmalak tawh dan te tarlangin, he inthlanna ah hian hnehna chang ngei tura hmalak zel dan turte pawh an sawiho nghal bawk.

Comments

Chhiar Hlawhte