Latest News

East Lungdar Block-a chhung-kaw 80 te Tuizem sem an ni

Shyama Prasad Mukherji Rurban Mission (SPMRM) hnuaia East Lungdar Block huam-chhunga chhungkaw 80 te hnenah Inrinni khan Rural Development Minister, Lalruatkima chuan litre 2000 dawng tuizem a sem.

Heng tuizem semna puala Inkhawm tawi East Lungdar BDO Complex-a East Lungdar BDO, H. Lalhruai-tluanga kaihhruai a neih ah RD Minister chuan SPMRM chu khawpui, Notified Town ni ve lo thingtlang khua ten khawpui anga hma an sawn ve theihna tura hmalakna a ni tih sawiin, a tirah Mizoram-a RD Block pahnih ah kalpui niin kan kalpui that avangin sawrkar laipui chuan RD Block dang pahnih ah kalpui leh remti in tunah hian East Lungdar Block bakah Aibawk, Khaw-zawl leh Thingsulthliah RD Block-ah te kalpui a nih tawh thu a sawi.

Minister chuan Pathian in mihring te tana ruahtui min pek chu lo khawlkhawm nachang hrelo mi tam tak kan awm thu sawiin, kan khawsak phung a changkan zel ruala tui kan mamawhna a san zel bawk si avangin kan environment hum-halh chunga ruahtui khawlkhawm nachang kan hriat a tul thu a sawi a. Chumi atana mipui ten tangkai taka an hman turin Mizoram-a a vawikhatna atan heng tuizem te hi sem a nih thu a sawi bawk.

He hun hmanna ah hian East Lungdar RD Block huamchhunga khaw 9-a chhungkaw 80 te hnenah Minister hian Tuizem te hi a sem-chhuak a, Tuizem dawngtute hi Sailulak khua ah chhungkaw 8, Leng-ah 8, Bawktlang-ah 5, Mualcheng-ah 8, East Lungdar-ah 21, Chekawn-ah 5, Sialsir-ah 5, Lungchhuan-ah 7 leh Khawlailung-ah chhungkaw 13 an ni.

RD Department changtu Minister, Lalruatkima hian East Lungdar BDO Office pawh tlawh nghalin East Lungdar BDO, H. Lalhruaitluanga leh a thawhpui ten an hmalakna te an lo hrilh a, BDO Office building thar sak dan tur pawh an sawiho nghal bawk.

Comments

Chhiar Hlawhte