Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

MLA atanga Lalduhoma paihthlak chhan hi Dan ngaih pawimawh vang a ni lo - ZPM Legal Board

ZPM Legal Board hruaitute chuan nimin khan Serchhip Press Club-ah thuthar thehdarhtute kawmin MLA atanga Lalduhoma paihthlak chhan chu Dan ngaih pawimawh vang ni lovin, Assembly House-ah thudik a tlangau pui thin vanga hnawksak tih vanga thuneihna hmachhuana ban a nih thu an sawi.

Nimin-a Serchhip Press Club-a thuthar tehdarhtute an kawmna hunah hian ZPM Legal Board Chairman, Vanlalsiama Pachuau chuan Serchhip A/C bialtu Lalduhoma, MLA a nihna atanga disqualified a nih chungchangah ‘Dan ngaih pawimawh vâng a ni’ tiin MNF Party chuan mipui rilru kawihpên an tum nasa hle tih sawiin, Lalduhoma ban a nihna ah hian Supreme Court Judgement pakhat Jagjit Singh –vrs- State of Haryana & Others (2006 (11) SCC 1) chu behchhan a nih thu a sawi a. Kum 2012 khan Supreme Court vêk hian D. Sudhakar & Ors vs D.N. Jeevanraju & Ors case-ah Karnataka State-a Independent MLA 5 te chungchang a rél tawh thu sawiin, “Supreme Court chuan Independent MLA 5 te hi BJP-ah enrolment engmah an ti lo a, membership nihna an nei lo a, Assembly House record-ah Independent MLA ang veka record an nih thu leh BJP member an ni lo tiin Speaker-in a disqualified-na leh Full Bench of Karnataka High Court-in a lo nemnghehna (upheld) order hi a lo paihthlak sak (quashed) leh a ni,” a ti a. Hemi bakah hian S.R. Bommai –vrs- Union of India AIR 1994 SC 1918-ah khan Constitution Tenth Schedule chungchang an ngaihtuahna ah chuan Tenth Schedule hian House pawn lam activities te a huap loh thu a sawi lang bawk niin a sawi.

ZPM Legal Board Chairman chuan Dan bu-a inziak, Para 2(2) of Tenth Schedule (Anti Defection Law) chu Lalduhoma hian a bawhchhe lo tih sawiin, “Mizoram Assembly Speaker-in a disqualified lai hian ZPM-ah hian enrolment a ti hauh lo a, member nihna engmah a nei lo,” tiin Para 2(2) of Tenth Schedule-ah ‘Political Party setup ni lo Candidate thlantlin (Independent MLA) ten Election zawh hnuah Political Party an zawm a nih chuan Disqualified tur an ni,’ tih a inziah thu leh ZPM setup leh organised MLA 7 te hi Zoram mipui leh Anti Defection Law zah vangin ZPM thuneitu sang chuan ZPM-ah enrolment ti lova moral support pe mai turin thu a lo tihtluk tawh thu a sawi bawk.

He hunah hian ZPM Legal Board General Secretary, Lalnunmawia Pachuau chuan MLA atanga inbanna chungchangah hian Court kal an cho tih sawiin, ruahmanna pawh engkim an siam thu a sawi a. “Hetihlai hian High Court lamah Pu Lalduhoma’n Stay order a hmu ang tih hlau fahranin MNF lam hian Pu L.Thangmawia, MLA hmingin Caveat Application an lo zu file rum rum mai a, heti taka High Court lama Pu Lalduhoma’n Stay Order a hmuh an hlau kha a mak zawk hial! Serchhip bial mipui te, uaplumtu MLA neih loh tir renga duhtawka Court case delay kha an tum ber a ni tih a langchiang hle,” a ti a. “Serchhip mipui ten bialtu MLA neih loh tir reng kha an duhthusam ni bera a lan tak si ah chuan he bial ruak hi a rang thei ang bera hnawhkhah leh hi ZPM duhdan kha a ni ta zawk a ni,” a ti bawk.

ZPM Legal Board Vice Chairman, VL. Nghata Keivom pawhin kum 1985-a Anti Defection Law an siam chhan ber chu sum duh vanga MLA uire thin te danbehna tur leh hremna tur a ni tih he hunah hian sawiin, Lalduhoma disqualified chhan leh Anti-Defection Law lo pian-chhuah chhan chu chhim leh hmar anga inpersan hlawk a ni tih a sawi a. Lalduhoma chu ZPM support-tu mipui thlantlin a ni tih Mizoram mipui hian an hrechiang em em nia sawiin, MLA atanga Lalduhoma ban a nih avanga sum leh pai leh tha tam tak senga bye-election buatsaih a ngai leh tur chu pawi an tih thu a sawi bawk.

Nimin a ZPM Legal Board in thuthar thehdarhtute an kawmna ah hian Serchhip-a ZPM hruaitu thenkhat te pawh an tel a ni.

Comments

Popular News (Last 30 Days)